Ве повикувам да престанете со пишување и навреди по етичка основа, затоа што тоа не придонесува не само кон стабилизација на политичките прилики во Македонија, туку предизвикува сериозни последици во политичкиот живот

Ваква е реакцијата на лидерот на Србите во Македонија и пратеник во Собранието, Иван Стоиљковиќ, на коментарот на новинарката Оливера Војневска, во Утрински весник, со наслов Српско за патриотите.Коментарот е напишан во врска со пуштањето на српска песна на промоцијата на жените на ВМРО-ДПМНЕ, а за Стоиљковиќ, тој е полн со говор на омраза.„Коментарите во медиумите во Р. Македонија се провокација од најтежок вид во однос на српскиот народ кој живее во Македонија… Пишувањето на тој начин го толкувам како обид за дискриминација на Србите во Македонија по етнички основ“, рече на денешната прес-конференција во Собранието, Стоиљковиќ. Според него, коментарот на Војневска е пишување со говор на омраза и смета дека е провокација кон Србија. „Отворено ќе ве прашам, дали Македонците не треба да ја пеат Калеш Анѓа, затоа што Турците во Македонија ќе се чувствуваат навредени“, рече Стоиљлковиќ. „Затоа ве повикувам да престанете со пишување и навреди по етичкка основа, затоа што тоа не придонесува не само кон стабилизација на политичките прилики во Македонија, туку предизвикува сериозни последици во политичкиот живот на Македонија“, рече Стоиљковиќ.Војневска е изненадена од реакцијата на Стоиљковиќ, особено затоа што во текстот тој или српската заедница не се воопшто спомнати.„За прес-конференцијата во Собранието дознав од колеги и се изненадив, бидејќи се работи за текст на новинар, уште повеќе се реаботи за коментар кадешто се работи за личен став. Најмногу се изненадив, поради тоа што пресот е организиран во Собранието, значи некој на Стоиљковиќ му дозволи да го злоупотреби Собранието“, рече Оливера Војневска, автор на коментарот.Таа смета дека Стоиљковиќ можел да реагира од седиштето на неговата партија, а вака „е притисок врз новинарите, со тоа што Собранието може да реагира на кој било друг напишан текст или прилог во медиумите“.„Сите изјави коишто се во насока на замолчување на новинарските пера се во функција на замолчување на новинарите и слободната мисла. Сметам дека новинарите треба да си пишуваат аргументирано, да не поттикнуваат говор на омраза, но политичарите ќе мора да се соочат и со новинарските кометари и заклучоци“, рече Мира Костиќ од Здружението на новинари.Сепак, според неа, секој пратеник има право да ја користи говорницата во Собранието наменета за нивно обраќање и не е спорно местото на одржување на прес-конференцијата, туку немањето „аргументи за да потврди она што тој сакаше да го каже дека српската заедница е дискриминирана со овие написи и се поттикнува говор на омраза. Јас во коментарот не видов такво нешто“, рече Мира Костиќ.