Претседателот на Владата на Република Северна Македонија, Христијан Мицкоски денеска одговарајќи на новинарско прашање во однос на тоа како тече изградбата на ветените патишта низ државата, изјави:

„Изградбата, ако се спореди со тоа како напредува сега и каква беше во истиот период, да речеме пред една или две години, можам да кажам дека разликата е десеткратно подобрена, во насока на динамиката.

Сведоци бевте на почетокот на годината дека се пуштија во употреба неколку експресни делници, меѓу кои и делницата Чатал-Длабочица-Крива Паланка, односно Страцин-Крива Паланка. Исто така делницата од Градско до Дреново практично сега треба да биде комплетирана. Да се продолжи и понатаму со реализација на овие проекти.

Понатаму со несмалена динамика се реализираат и коридорите 8 и Коридорот 10Д, тоа што беше заглавено со години сега се одглавува, веќе фронтот е отворен. Очекувам дека до крајот на следниот месец експропријацијата, имотно-правните односи ќе бидат разрешени, со што се отвара фронт за градежните компании.

Истовремено се бара решение за делницата Требениште-Ќафасан, бидејќи знаете дел од таа делница е во периметар заштитен со УНЕСКО, се разговара со компанијата изведувач. Истовремено со не смалена динамика се работи на делницата од Кичево до Охрид. Очекуваме од Врбјани до Охрид, со исклучок на делот кај Ботун, да биде, исто така пуштена.

Првата секција од пругата кон Бугарија, Куманово-Бељаковце е пуштена, се работи на делот од Бељаковце до Крива Паланка. Се разговара со источниот сосед, со Бугарија на високо ниво околу третата секција и делот којшто припаѓа во Бугарија“, истакна Мицкоски и додаде:

„Бидејќи кажав и вчера, ќе повторам, Коридорот 8 подразбира поврзување на Драч и Бургас. Коридорот 8 не подразбира поврзување на Куманово и Крива Паланка. Затоа сакаме да знаеме јасно какви се плановите на нашите соседи. Ние нашето си го завршуваме, граѓаните ги плаќаат кредитите што ние ги земаме како држава и градиме. Сакаме да видиме што ќе се случува во Бугарија и во Албанија, тоа е практично Коридорот 8. Така што ценам дека динамиката е исклучително добра и очекувам во периодот којшто следи уште многу убави вести за македонските граѓани.“

„Јас очекував дека СДСМ ќе биде порационален во своите изјави. И сега тоа што го прочитав навистина за мене беше неочекувано, мислев дека еднаш ќе застаневме заедно за да обезбедиме национален консензус и заеднички да работиме на промените, да не биде еднострано, да не бидеме ние обвинети дека ете правиме нешто кое што е дел од коалицијата која што е во Владата.“ вели претседателот на Владата Христијан Мицкоски одговарајќи на новинарско прашање како ги коментира обвинувањата на Венко Филипче за партизација на Судскиот совет.

Премиерот Мицкоски упати апел до сите парламентарни партии да се вклучат и заеднички да работата на промените се со цел да се обезбеди општествен консензус.

„Јас ги поканувам сите парламентарни партии заеднички да го работиме овој процес, да биде инклузивен. Еве да направиме една нова пракса, да обезбедиме еден општествен консензус дека ни се потребни промени и заеднички да работиме тие промени да се случат. Но, не може никако причината да стане решение. Сега причината за ваквата состојба во судството, а тоа е Владата која што 7 години беше таму каде што беше и позади кои што одлуки има многу контроверзии и скандали, посебно во судството, не сакам да ве потсетувам на оној шверцерски поминат Кривичен законик со европско знаме, сега тие од една страна се претставуваат себеси како решение. Процесот треба да е инклузивен, да имаме општествен консензус.“, вели тој и додаде:

„Еве не сакаме ние да имаме ексклузивно право само ние да ги правиме тие измени, ги повикувам сите пратеници во Парламентот ако се согласуваат дека треба да се распушти овој Судски совет кој што тие го гласале, ги повикувам кога ќе дојде точката на дневен ред да гласаат, во насока на тоа да бидат разрешени овие членови на Судскиот совет.

А, потоа заедно во еден инклузивен процес да најдеме луѓе кои што ќе мониторираат и ќе бидат тие кои што ќе идентификуваат судии кои што злоупотребуваат тоа што се судии и кои што се причинители би рекол поради нивните контроверзни одлуки на некои процеси кои не треба да ни се случуваат.“

Министерот Тошковски во своето излагање дефинира неколку најважни точки на предлог законските измени и унапредувања, кои ќе го зајакнат системот со цел унапредување на безбедноста во сообраќајот:

„Ревидирање на законските одредби што ги регулираат сообраќајните прекршоци, конкретно сметам дека мора да го ревидираме членот 297а од Кривичниот законик, кој се однесува на безобѕирно возење, односно јасно да се разграничи од постојните одредби што регулираат сообраќајни прекршоци во ЗБСП во делот на брзото возење и наместо алтернативно да се изрекувва глоба, таа кумулативно да се изрекува со казна затвор.
– Проширување на можностите на системот „Безбеден град“ да препознава нерегистрирани возила;
– Набавка на тестови за дрога. Веќе сме во подготвителна фаза за набавка и на тестови за дрога, нешто што досега никогаш не било имплементирано, а според анализите, возењето под дејство на опојни дроги е исто толку опасно како и возењето под дејство на алкохол;
– Одземање на возилото при најтешките случаи на безобѕирно возење;
– Инкриминирање на управување моторно возило без положен возачки испит;
– Дигитализација и целосно поврзување на МВР со судовите, со цел полесна евиденција на изречените забрани за управување со моторно возило;
– Целосно имплементирање на системот „Безбеден град“, кој ќе гарантира дека санкциите се спроведуваат доследно и континуирано;
– Аплицирање промени што ќе овозможат системот да дава ефективна контрола и строги санкции за рецидивистити преку институционална вмреженост и ефикасна размена на податоци помеѓу институциите. Еден од поголемите проблеми што ги имаме во контекст на сообраќајната безбедност е огромниот расчекор помеѓу бројот на пријавени и осудени прекршители. Постојат многу случаи во кои луѓе што сториле тешки кривични дела во сообраќајот поминуваат со минимални или дури и условни казни. Казните, колку и да се високи на хартија, не значат ништо ако тие не се изрекуваат, а уште помалку ако не се спроведуваат. Ние мораме да го разбиеме овој систем на компромиси и полуправда, односно неправда.

Министерот потенцира дека одлуките што ќе се донесат на самата расправа ќе бидат пресудни за тоа дали ќе изградиме општество во кое владее ред и закон или ќе продолжиме да живееме во средина во која беззаконието и неказнивоста стануваат норма и дека ова е можност што не смее да се пропушти да се направи вистинската промена, промена што ќе спаси животи, што ќе донесе правда и што ќе обезбеди систем што ќе функционира за сите граѓани еднакво.