Дали Македонија може да очекува напредок во евроинтеграциските процеси во наредните шест месеци додека на чело на ЕУ е Шпанија или возот го испушти за време на шведското претседателство

„Македонија никогаш до сега не била во приоритетите на Шпанија ниту тоа може да се очекува сега. Јасни се пораките што ги добивме од официјален Мадрид, мислам дека тие ќе се фокусираат повеќе на Србија и дека сметаат оти таа треба да биде локомотива на регионот и дека ако влеземе ќе влеземе заедно со Србија“, вели Андреј Жерновски од ЛДП.Според него Македонија ги испуштила роковите иако прва го потпиша договорт за стабилизација и асоцијација во целиот регион. „Затоа сметам дека требаше да ги искористиме претходните шест месеци кога го имавме Карл Билт којшто исклучително добро го познаваше овој регион и навиваше Македонија да добие датум за преговори меѓутоа ние не успеавме поради познатиот став на македонскиот врв“, вели Жерновски. За владејачката ВМРО-ДПМНЕ ништо драстично нема да се смени, затоа што некоја земја е председавач со Европската Унија, без разлика дали е Шпанија или некоја друга, но специфично е што тоа ќе биде прв пат по Лисабонскиот договор, кога надлежностите се поинаку поделени. „Како што знаете во заклучоците коишто се донесоа во декември стои дека во наредните 5-6 месеци, односно во текот на шпанското претседателство Европскиот совет потворно ќе се наврати на прашањето на Република Македонија. Завршувањето на прашањето не зависи ниту од шпанското претседателство, ниту од кое било друго претседателство, затоа што ЕУ гласа со консензус, такашто во моментот зависи од Грција и од она што се вика политика на Грција“, рече пратеникот Александар Николовски од ВМРО-ДПМНЕ. Тој потврди дека Македонија се обидува да најде заеднички прифатливо решение, но дека во моментов за жал нема клима за тоа.