Македонското малцинство е признаено во Албанија, но тоа не е случај со Бугарија и со Грција.

Ова го покажуваат последните извештаи на Стејт Департментот за состојбата со човековите права во Албанија, Грција и Бугарија објавени синоќа.Стејт департментот во својот извештај посветен на Албанија, констатира дека македонското, заедно со повеќе малцинства е признато од страна на официјална Тирана.„Законот дозволува статус на малцинство за националните групи и одвоено за етнојазичните групи. Грците, Македонците и Црногорците се одредени како национални групи, меѓу кои грчката е најголема. Власите и Ромите се дефинирани како етно-јазични групи.Полоша состојба во однос на статусот на македонското малцинство се забележува во Бугарија и Грција. Стејт департментот ги забележува случаите на неможноста за регистрирање на партијата ОМО Илинден – Пирин и на културното-едукативното друштво „Никола Вапцаров“ од Благоевград.„Во текот на годината власта продолжува да ја спречува регистрацијата на македонската група активисти Илинден како политичка партија и покрај пресудата на Судот за човекови права во Стразбур од 2005-та година против поништувањето на првичната регистрација. Во текот на годините, членовите на Илинден продолжуваат да се жалат на непријателски однос од страна на локалните власти, вклучувајќи испрашувања од страна на полицијата“, се вели во извештајот.Слични констатации има и во извештајот посветен на Грција. Покрај контактирањето на тешкотии во слободно политичко и културно здружување на македонското малцинство, Стејт Департментот забележува и на непризнавање на македонскиот јазик од страна на официјална Атина.„Власта не го признава постоењето на словенски дијалект, наречен „Македонски“ од страна на луѓето што го говорат во северозападните делови на земјата“, се констатира во извештајот.Со реакција се огласија од партијата Виножито. Го поздравуваат извештајот на Стејт департментот, но се противат на употребата на поими како „Словенски дијалект“.

„Ова не се поими за самоопределување и би било соодветно во извештај што ги третира човековите права, Стејт Департментот да ги почитува принципите на самоопределување и ја именува оваа група и нејзиниот јазик едноставно како македонска“, се вели во реакцијата на „Виножито“, зад која се потпишани и македонските комитети за човекови права од Канада и од Австралија.