Годинашното дигитално аплицирање во средните училишта значеше само повеќе мака и ангажман на родителите во споредба со претходните уписи. Иако министерката за образование, Весна Јаневска, го најави како дигитално, ниту училиштата, ниту пак останатите институции од каде што требаат документи за упис во средно, не се прилагодија на дигитализација. Училиштата не испратија дигитални свидетелства на учениците, ниту пак се дигитални доказите за освоени први места на државни натпревари кои се валидни за уписот во средно училиште. Дигиталното пријавување во средно училиште годинава значеше родителите да се снајдат и сите свидетелства и освоени први места на државни натпревари на децата да ги скенираат за да можат да ги закачат во дигиталната апликација.

Иако во прикачените свидетелства стојат оценките, родителите мораа сами да ја внесат оценката за секој предмет на детето од шесто до деветто одделение. На крајот, во годинашното дигитално аплицирање, се бараше од родителите покрај сите свидетелства и државни награди, физички да ги донесат во училиштата и дигиталните апликации, претходно отпечатени.

Министерката Јаневска и денес, како неколкупати претходно, кажа дека системот и годинава бил подготвен за целосна дигитализација на процесот, но проблем биле руралните средини кои немаат стабилен интернет, а некои, пак, немаат ниту компјутери. Најави дека интензивно ќе работат на опремување на училиштата со се што е потребно за поголем степен на дигитализација.

„Оваа година не го правиме тоа затоа што огромен број наши ученици не знаат како тоа да го направат. Огромен број на родители не знаат како тоа да го направат. Не е Скопје Македонија. Во Скопје и во неколку поголеми градови ние немаме проблем. Лесна е процедурата, но дигиталната писменост треба да се поткрене на повисоко ниво. Јас не очекувам од родителите да знаат, но учениците треба да знаат и наставниците треба да знаат за да им помогнат во тој процес. Обично сега им помага администраторот или евентуално училиштето ако има информатичар. Затоа се уште велиме дајте ги и во хартиена форма додека населението не се подготви. Имаме рурални средини и помали општини каде што немаат компјутерска лабораторија или училница, каде што интернетот не е стабилен, каде што и професорот ги нема технолошките средства па не може да ги научи како, но оваа година ние масовно снабдуваме со се што е потребно за да може овој процес на дигитализација да се подобри. Со исто темпо ќе продолжиме и следната и да очекувам дека над 90 проценти следната година ќе може да се заврши така“, рече денес министерката Јаневска.

За некои ученици, министерката вели дека и следната година ќе биде оставен простор да донесат хартиени документи, но генерално аплицирањето ќе биде дигитално и средните училишта дигитално ќе ги преземаат свидетелствата. На ист начин, дигитално, свидетелствата ќе ги преземаат и факултетите. За оние кои ќе одлучат да студираат во странство за кои министерката се надева дека ќе бидат се помалку, ќе има можност да им се отпечатат документите.

Министерката Јаневска најави дека вечерва до деветнаесет часот ќе биде извесно дали и во кои средни училишта ќе се полага квалификационен испит во вториот уписен рок, кој е во тек. Таа потврди дека во гимназијата „Орце Николов“ се останати шест места, а се пријавиле неколкумина повеќе ученици поради што најверојатно ќе се полага квалификационен испит.

Второ место меѓу тимови од 30 држави, меѓу 73 илјади натпреварувачи е многу високо достигнување и потврда дека Македонија има талентирани и едуцирани деца кои одлично ги познаваат економските процеси, знаат да планираат буџет и да управуваат со пари и финансиски ризизи, рече министерката за образование и наука, Весна Јаневска, на доделувањето на наградите на ученичкиот тим кој ја претстави Македонија на Европскиот квиз на пари 2025 година, што го организира Европската банкарска федерација.

„Министерството за образование и наука се заложува да ја подигне финансиската писменост меѓу сите млади. Важно е и затоа ќе започнеме посериозна соработка со финансиските институции како Народната банка, Македонската банкарска асоцијација и Комисијата за хартии од вредност и заеднички ќе го обликуваме моделот преку кој уште поефективно, финансиски ќе ги едуцираме новите генерации“, рече Јаневска.

Информираше дека државата ги зголеми средствата за поддршка на талентираните ученици, за да може без било какви грижи, во иднина да учествуваат на големи меѓународни натпревари и олимпијади.

„Првенствено заради вас, заслужувате поддршка во градењето на талентот. Но и да му покажеме на светот дека и оваа земја има извонредни деца кои се подготвени да управуваат со општествените процеси и да учествуваат во креирањето и насочувањето на глобалните текови и трендови“, додаде министерката.

Изрази благодарност до Македонската банкарска асоцијација што го организира националниот квиз за пари и порача активноста да продолжи и во иднина, заоа што го стимулира натпреварувачкиот дух на младите и придонесува во градење на финансиски писмени и одговорни генерации.

Награди на денешниот наста им беа доделени и на учениците кои ги освоија второто и третото место на националниот квиз на пари.

На годинешниот Европски квиз за парите на кој се натпреваруваат ученици на возраст од 12 до 15 годин, второто место го освоија македонските ученици Марин Христоски и Алексеј Мицкоски од ООУ „ Кире Гавриловски – Јане“ од Прилеп, под менторство на наставничката Соња Јорданоска. Тимот од Италија го освои првото место, додека третото место ѝ припадна на Шведска.

Претставници од Македонија второто место освоија и во 2019 и 2020 година, а во 2024 година беа третонаградени.

Не прифаќаме наметнувања под маска на европскиот процес, изјави премиерот Христијан Мицкоски, на заедничката прес – конференција со еврокомесарката за проширување, Марта Кос, по лидерскиот самит на Европската Унија и Западен Балкан посветен на Планот за раст што се одржува во Скопје.

Тој кажа дека Западен Балкан се приближува кон Европската Унија не со зборови, туку со дела, со реформи, резултати и со интеграција што се чувствува во секојдневниот живот на граѓаните.

„Фактот што сме домаќини на овој лидерски самит е важна симболична потврда за нашата регионална и европска релевантност. Тоа не е случајност. Тоа е резултат на политичкиот капитал кој го вложивме во стабилноста, реформите и конструктивниот пристап. Ова е признание за улогата што нашата држава ја има во градењето мостови и создавањето решенија. На денешните разговори се фокусиравме на реализација на Планот за раст на ЕУ за Западен Балкан, кој претставува историска шанса за сите нас. Тоа е механизам кој ни овозможува не само пристап до инвестиции и фондови, туку и мотивирачка рамка за унапредување на владеењето на правото, ефикасноста на институциите и економската конкурентност“, рече Мицкоски.

За нас, додаде тој, овој план не е формалност. Според Мицкоски, тоа е алатка преку која ќе ја трансформираме земјата, ќе ги модернизираме јавните услуги, унапредиме образованието, ќе инвестираме во енергетска и дигитална инфраструктура и ќе ја направиме татковината вистински европски дома – пред да стане формално дел од ЕУ.

Но, исто така, додаде Мицкоски, сакам да бидам јасен дека нашите чекори по европскиот пат се со отворено срце и разум. Со прифаќање на европските вредности.

„Меѓутоа се противиме на уцените кои не се дел од тие вредности. Не прифаќаме наметнувања под маска на европскиот процес. Европа е дом на правото, на правдата, на достоинството. Тоа се вредностите што ги прифаќаме – сè друго е туѓо за Европската Унија, и туѓо за нас“, рече премиерот.