Со реформите во секундарното здравство, со приватизацијата на лекарите специјалисти во Крива Паланка се доведува во прашање понатамошното опстојување на самото болничко одделение во Крива Палaнка, тврдат од невладината организација „Хоризонт Македонија, од министерството негираат

„До денеска функционираа овие неколку одделенија, но за жал мораме да констатираме дека со оваа трансформација и оваа реформа во здравството односно во секундарното здравство околу 25.000 граѓани на Крива Паланка ќе останат без болнички одделeнија“ изјави претседателот на „Хоризонт Македонија“, Ивица Младенов.Според законските нормативи, и болницата во Крива Паланка и сега е надвор од законот и има едно хибридно решение кое е донесено во 2005 година  како резултат на притисокот на граѓаните, бидејќи тогаш со трансформација на медицинските центри во здравствени домови и болници се укинаа болничките одделенија. По протестот на граѓаните неколку одделенија до денеска функционираат.„Со отпочнување на приватизацијата на секундарното здравство, повеќе од факт е дека за едно кратко време Крива Паланка останува без болница“, тврди Младенов.Тие бараат од Министерството за здравство да ја преиспита одлуката и да го регулира статусот на болничките одделенија.

Од понеделник отпочнуваат акција за собирање на потписи, а потоа најавуваат и протести пред здравствениот дом и локалната самоуправа во Крива Паланка, а ако не се исполнат нивните барања ќе го блокираат магистралниот пат кон Деве Баир.

„Апсолутно не е точно дека со претстојната трансформација на специјалистичката дејност, граѓаните на Крива Паланка ќе останат без соодветна здравствена услуга, а Здравствениот дом во овој град без болнички одделенија“, се вели во реакцијата на Министерството за здравство. „Со трансформацијата на специјалистичката здравствена дејност не се доведува во прашање постоењето на кој било сегмент во Здравствените домови, вклучувајќи ги и болничките одделенија во Здравствениот дом во Крива Паланка кои функционираат според законот и важечката регистрација издадена од Министерството за здравство уште во 2005-та година“. Според нив жителите на Крива Палнака и во иднина ќе добиваат здравствена заштита во Здравствениот дом, каде функционираат и три болнички одделенија за интерни болести, за хирургија и за невропсихијатрија.