Преку проектот „Старите касарни за нов развој-Владата за граѓаните“, денеска во Битола, Министерството за одбрана предаде неколку објекти од касарната „Стив Наумов“ кои во иднина ќе ги користат МВР и МОН

„Дел од објектите во битолската касарна сега ќе бидат во функција на локалниот економски развој, во функција на образованието и други потреби. Очекуваме до 1 јуни да заврши изработката на детален урбанистички план, потоа ќе ја утврдиме почетната финансиската вредност на објектите, а наесен ќе почне процес на девестирање, продажба или издавање и на други објекти“, рече министерот за одбрана, Зоран Коњановски, на денешната средба во Битола.

Министерството за внатрешни работи се стекна со два објекти и простор што ќе го користи СВР-Битола.

„Со овие два објекти  се зголемува просторниот капацитет за потребите на МВР и се овозможува физичко раздвојување на СВР-Битола како регионален центар, од  полициската станица во Битола и за нас тоа е посебно важно“, рече министерката за внатрешни работи, Гордана Јанкулоска, на средбата со новинарите.

Добиените објекти Министерството за образование и наука одлучи да ги додели на Универзитетот „Св.Климент Охридски“-Битола.

„Секој објект е важен за зголемување на образовното ниво во Македонија и тоа директно влијае врз економското и општественото ниво на развој. Очекуваме битолскиот Универзитет овие нови простории да ги стави во функција со почетокот на новата академска година“ рече министерот за образование и наука, Никола Тодоров.

Касарната „Стив Наумов“ во Битола се наоѓа во непосредна близина на центарот на градот, во рекреативната зона под Тумбе кафе и се простира на површина од 98 хектари.

„Во поранешната касарна ќе има нов плоштад, ќе го прошириме градското јадро, ќе има многу содржини што ќе ги предвидиме со деталниот урбанистички план“, потврди битолскиот градоначалник Владимир Талески, додавајќи дека тоа земјиште ќе биде попривлечно за инвестиции.