Државната делегација на Република Македонија предводена од претседателот на Собранието Трајко Вељаноски која се наоѓа во Рим во рамките на одбележувањето на традиционалната манифестација “Македонија во чест на Свети Кирил”, денеска беше на аудиенција кај папата Бенедикт 16.

Како што соопшти прес-службата на Собранието, на аудиенцијата кај папата Бенедикт Шеснаесетти, претседателот на македонското Собрание Трајко Вељаноски искажа длабока почит и благодарност за приемот, ги пренесе поздравите упатени од државниот врв на Република Македонија и го посочи значењето на пасторалната мисија на неговата светост, несебичното залагање за мир, солидарност и љубов меѓу сите народи, имајќи ги во предвид сите искушенија и предизвици со кои светот се среќава. „Неговата светост папата Бенедикт Шеснаесетти на аудиенцијата изрази надеж за скоро решавање на спорот со името на Република Македонија и истакна дека секој има право да го користи сопственото име“, се наведува во соопштението. Претседателот Вељаноски, се додава, ја искористи можноста уште еднаш да упати покана до папата Бенедикт 16 да ја посети Република Македонија. Вељаноски оствари средба и со државниот секретар на Светата столица, кардиналот Тарчисио Бертоне при што изрази благодарност за принципиелната поддршка која Република Македонија ја добива од Светата столица. „Христовото учење, верата и црквата заедно со јазикот и писменоста кои светите браќа Кирил и Методиј му ги оставија на македонскиот народ се темелни вредности врз кои е дефиниран и врз кои се развива нашиот национален и културен идентитет“, истакнал претседателот Вељаноски. Во официјалната делегација покрај претседателот Вељаноски се и координаторот на пратеничката група на ВМРО-ДПМНЕ,  Силвана Бонева, заменик-координаторите на пратеничките групи на ДУИ, СДСМ и на НСДП, ЛП и НА, Сафет Незири, Марјанчо Николов, Горан Мисовски, замениците министри за надворешни работи и за култура Зоран Петров и Драган Недељковиќ и директорот на Комисијата за односи со верските заедници и религиозни групи во Република Македонија,  Валентина Божиновска. Делегацијата во понеделник на 24 мај ќе учествува на молебен на гробот на Свети Кирил во базиликата „Сан Клементе” во Рим. Претседателот на Собранието, Трајко Вељаноски во рамките на посетата на Рим, на 25 мај ќе оствари средба и со претседателот на италијанскиот Парламент, Џанфранко Фини.