Македонија особено ја цени соработката со Венецијанската комисија, чии правни експертизи и совети, значително придонесоа во подготовката на квалитетни законски прописи и нивното усогласување со меѓународните и европските стандарди

Ова го истакна македонскиот министер за надворешни работи Антонио Милошоски во улога на претседавач со Комитетот на министри на Советот на Европа во денешното обраќање во Венеција на одбележувањето на 20-годишнината на Венецијанската комисија, јави известувачот на МИА. Тој во оваа прилика напомена неколку примери во кои Македонија  искористи експертиза на Венецијанската комисија, како што беше случајот со подготвувањето на изборниот кодекс во 2008 година, а  во рамките на локалните и претседателските избори во март 2009 година Комисијата пак овозможи поддршка и обучи 80 тренери кои потоа го пренесоа своето знаење на сите членови на избирачките комисии во државата.Венецијанската комисија во изминатите 20-години, како што истакна, придонесе во промовирањето и заштитата на основните принципи и стандарди на Советот на Европа во областа на демократијата, човековите права и владеењето на правото, пренесе МИА.Во своето излагање, Милошоски ја изрази цврстата определба на Советот на Европа и Република Македонија како претседавач со ова тело, за продолжување на соработката и поддршката за работата на Венецијанската комисија која, како што рече, е од витално значење за обезбедувањето на униформноста и конзистентноста на правните системи на европските држави во поглед на виталните европски стандарди и принципи.- На 11 мај годинава го преземавме претседавањето со Комитетот на министрите на Советот на Европа. Во месеците пред нас ќе се обидеме да ги пренесеме потребата, надежите и аспирациите на 800 милиони  граѓани од 47-те земји членки. Ќе се обидеме да одговориме на потребите на земјите од регионот каде Венецијанската комисија има важна задача во изборниот процес, нагласи Милошоски.Европската комисија за демократија преку правото на Советот на Европа (Венецијанската комисија) е формирана со парцијален договор од страна на земјите-членки на Советот на Европа на 20 мај 1990 година, како независно експертско тело, специјализирано за подготовка на експертизи, стручни мислења, препораки и насоки за усогласеноста на уставните норми и законските проекти во земјите-членки со стандардите и принципите содржани во Конвенциите на Советот на Европа.Мексико е последната држава која годинава се приклучи на 57-те земји полноправни членки на Венецијанската комисија.Во македонската делегација која учествува на одбележувањето се и претседателот на Уставниот суд на Република Македонија Трендафил Ивановски, уставниот судија Наташа Габер – Дамјановска и професорката од Правниот факултет во Скопје Гордана Силјановска-Давкова, која е дел од експертскиот тим на Венецијанската комисија.На церемонијата учествуваат повеќе високи претставници од Советот на Европа и други меѓународни организации (ЕУ, ОБСЕ), меѓу кои: ГенСек на СЕ, Торбјорн Јагланд, претседателот на ПС на СЕ, Мевлут Чавушоглу, претседавачот со ОБСЕ, министерот за надворешни работи на Азербејџан Елмар Мамадајров, како и државни претставници од повеќе земји-членки на Советот на Европа. На маргините на настанот министерот Антонио Милошоски оствари билатерална средба со претседателот на Венецијанската комисија Џиани Букичио, на која се дискутираа досегашните успеси на Комисијата и можностите за продлабочување на соработката со Комитетот на министри на Советот на Европа.Милошоски и Букичио констатираа дека Венецијанската комисија игра важна улога во промовирањето и заштитата на основните принципи и стандарди на Советот на Европа во областа на демократијата, човековите права и владеењето на правото.