Жестока дебата предизвика првото читање на Предлог законот за кривична постапка пред членовите на Собраниската комисија за политички систем и односи меѓу заедниците

Пратеникот Владо Бучковски од СДСМ го обвини министерот за правда, Михајло Маневски за партизација на судството и рече дека тој немал кредибилитет да предлага и спроведува ваков закон. „Најголемата реформа што треба да се направи е министерот да замине. Ако министерот не замине, јавната расправа што вие ќе ја организирате ќе покаже дека експертската и стручната јавност не се согласува со овој концепт“, рече Бучковски.Дел од членовите на комисијата побараа пратеникот Бучковски да не се служи со лични дискфалификации во дискусијата.„За мене е навистина несфатливо како еден универзитетски професор и пратеник, кој со полна уста зборува за демократија, им лепи етикети на присутните дека немаат кредибилитет да предлагаат закони или да зборуваат и не извлекол поука од изречената судска пресуда дека клеветел“, рече Силвана Бонева од ВМРО-ДПМНЕ.„Јас очекував колешката нешто да каже за министерот, но очигледно таа сака овде да ја водиме расправата што не ја водевме во судницата дали таа поседувала бугарски пасош или не. Јас тоа нема да го направам овде, затоа што имам нарачано супер-вештачење со кое треба да се потврди дали колешката е психо-физички способна да ја обавува функцијата пратеник“, одговори Бучковски.Опозицијата со став – Македонија нема средства, нема технички услови и нема кадри за спроведување на овој закон. Од своја страна, министерот Маневски одговори дека преку донатори се обезбедени дел од средствата за примената на законот по неговото донесување и дека системот навреме ќе биде подготвен за негова ефикасна примена. „Околу капацитетите, за разлика од порано што ништо не беше сторено, за овие три години комплетно се реновирани 11 судови со проширена надлежност. Значи, реновирани се простории од околу 29.000 метри квадратни, со нови судници, со нови кабинети, со нови простори. Тоа се најголемите судови во Република Македонија. Во нив се создаваат капацитети за примена на одредби од законот. Она што е значајно, градиме и нов кривичен суд кој што ќе биде во функција  на ова што го говориме“, рече министерот Маневски.Тој информираше дека, поради потребното време за обука за службеници од неколку институции, законот ќе има одложна примена од две години.