Македонија
11-ти Oктомври е столб на македонската нација, порачаа борците

Државни, партиски и делегации на борците од Народно-ослободителната борба денеска положија свежо цвеќе на Партизанските гробишта во Бутел и на гробот на командантот на Генералштабот Михајло Апостолски по повод празникот 11 Октомври-Денот на антифашистичкото востание и НОВ
Учесниците во оваа борба ја искористија приликата да се потсетат на деновите пред речиси седум децении и да порачаат дека 11-ти октомври е најголем македонски празник.„Горда сум на наша Македонија. Горда сум на македонскиот народ кој е вечно во некаква борба, вечно во некакво докажување. Празникот 11 октомври е најголем македонски празник. Тој е столб на македонската нација, столб на македонската држава. Го слави секој. За мене анти-фашистичката борба е карактеристична што учествуваше народ, и мажи и жени. Јас ќе ги повторам зборовите на една жена од војната: нашите кесиња беа касите на партизаните, нашите сандуци беа сандуци за оружје, така што огромна улога одиграа и жените“, вели Олга Божиновска, борец од 1941 година.„Македонскиот народ, по 23 години окупација од кралска Југославија, од царска Бугарија, од кралска Грција никој не знае што поминал за да опстои. Тогаш се јавија младите комунисти и гинеа година, година и половина за да го прават при свест тој народ, да ја продолжи својата развојна линија што му беше прекинувана“, изјави Тодор Атанасовски, претседател на Сојуз на борците од НОАВМ 1941-1945 година.Почит на загинатите оддадоа високи државни и партиски делегации.„Деновите како 11-ти октомври не потсетуваат на се она што се случувало во инатот и на сите жртви што се паднати за слободата на Македонија. На деновите како денешниот се потсетуваме и на се она што е жртвувано за да ние живееме во една слободна држава и за заветот што претходните генерации го имаат оставено на денешните генерации за чување на слободата на Македонија и ние нивниот завет ќе продолжиме и понатаму да го чуваме“, изјави Васко Наумовски, заменик-претседател на Владата задолжен за европски прашања.„Навистина треба да ги почитуваме делата што се направени од 1941-ва до 1945-та година. Многу луѓе, херои, го дадоа својот живот за оваа денешна независна Македонија и мислам дека и по општо и поконкретно Владата и државата треба да го прославува овој празник.“, рече Јани Макрадули, потпретседател на македонското Собрание.„Во Втората Светска Војна Македонија беше на вистинската страна, благодарение на партизанските одреди и партизанските бригади, со повеќе од 20.000 жртви и со огромни страдања. Но 100-илјадната македонска војска на крајот на војната беше најдобар гарант за државноста на Македонија кој што никој потоа не можеше да ја одрекува“, изјави Влатко Ѓорчев од ВМРО-ДПМНЕ.Со нападот на борците од Првиот прилепски партизански одред врз бугарскиот полициски участок и врз телефонско-телеграфската мрежа во Прилеп на 11 октомври 1941 година започна организираното востание на македонскиот народ против фашистичкиот окупатор.Еден ден подоцна започнаа борби и во Куманово, што беше вовед до конечното ослободување на земјата и создавањето на современа Македонија.Со одлуката да пристапи кон антифашистичката коалиција Македонија застана на страната на прогресивното човештво, а против фашизмот како најтемна идеологија од современата историја и најсилна негација на општоцивилизациските и демократски вредности.По повод празникот, ширум земјата се одржуваат повеќе пригодни свечености.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Свадба во струмичкиот затвор – осуденик го кажа судбоносното „да“

Во струмичкиот затвор денес се одржа невообичаен, но длабоко хуман чин – законска регистрација на брак на осудено лице кое моментално ја издржува затворската казна.
Настанот се реализира под покровителство на директорот на установата, Зоран Ристов, и заменик-директорката, Наташа Лазарова Донева, како дел од заложбите за почитување на човековите права и обезбедување правна сигурност за сите, без исклучок, соопшти Управата за извршување санкции.
Со оваа регистрација, лицето се стекна со правен идентитет – важен предуслов за пристап до здравствена, образовна и социјална заштита, но и чекор напред кон успешна ресоцијализација.
Од Управата додаваат дека ваквиот чин е резултат на добра координација меѓу затворската управа, стручните служби и релевантните институции, и покажува дека и во пенитенцијарниот систем постои волја за хуманост, инклузивност и правичност.
Македонија
Нов ЕХО апарат на гинекологија во Чаир за побрза и попрецизна дијагностика

Специјалната болница за гинекологија „Мајка Треза“ во Чаир доби нов ЕХО апарат, со кој значително се подобрува дијагностиката кај бремените жени и пациентките со гинеколошки проблеми.
Апаратот, вреден над 3,5 милиони денари, е обезбеден со поддршка од АД МЕПСО, која донираше над 2,7 милиони денари, како и со сопствени средства на болницата во износ од 800 илјади денари.
„Со новата апаратура ја зајакнуваме грижата за здравјето на жените, токму таму каде што е најпотребно. Зад секој апарат стои грижата за секоја жена, за секоја бремена мајка, за секој нов живот“, изјави министерот Азир Алиу за време на денешната посета на установата, придружуван од директорот на МЕПСО, Бурим Љатифи.
Оваа инвестиција претставува чекор кон унапредување на квалитетот на здравствените услуги и грижата за женското здравје.
Македонија
Со метален предмет го убил брата си, па го закопал во дворот од заедничката куќа: расчистено убиство во Кавадарци

Денеска (06.08.2025), ОВР Кавадарци до Основното јавно обвинителство Кавадарци, поднесе кривична пријава против С.И.(43) од Кавадарци поради постоење основи на сомнение дека сторил кривичнo делo „убиство“ по член 123 од Кривичниот законик.
Тој се сомничи дека на 27.07.2025 во семејниот дом во Кавадарци со метален предмет нанел повреди на неговиот брат И.И.(42) од Кавадарци, од кои тој починал, по што телото го закопал во помошен објект во дворот од заедничката куќа.
Имено, вчера (05.08.2025), нивната сестра В.О.(44) во 11:00 часот во ОВР Кавадарци го пријавила за исчезнат нејзиниот брат И.И.. Додека, во 13:00 часот пријавила дека во помошниот објект во дворот од куќата на нејзините браќа, каде што отишла со сопругот, забележале дека има ископ покриен со ровка земја, по што се посомневале дека е можно нејзиниот исчезнат брат да е закопан внатре.
Веднаш по пријавата, на местото излегле јавен обвинител, полициски службеници и претставници од Институт за судска медицина Скопје, а од погребално претпријатие откопана е дупката и било пронајдено телото на И.И..
По наредба на јавен обвинител, телото на починатиот било дадено на обдукција и вештачење. Истиот ден во 14:40 часот, по извршени оперативни проверки и добиени сознанија и во координација со јавен обвинител, полициски службеници го лишиле од слобода С.И., по што го спровеле во јавното обвинителство, каде во службен разговор го признал делото.