Република Македонија се најде на 62-то место според индексот на перцепција на корупцијата за 2010 година на Транспаренси Интернешнл, во конкуренција на 178 држави, што претставува напредок од девет места во однос на лани

На скалата од 0 до 10 индексни поени, Македонија има 4,1 индексен поен, што претставува подобрување за 0,3 индексни поени во споредба со претходната година. Со ваквиот резултат Македонија заедно со Хрватска се најде на второто место меѓу државите од поширокиот регион, а единствено пред нив се наоѓа Турција. Претседателот на македонската Транспарентност Нулта корупција Слаѓана Тасева вели дека ваквата споредба со останатите држави не треба да залажува, бидејќи на Македонија и престојува уште многу работа за да може да надмине пет индексни поени. „Она што е битно е да се следи степенот на индексот на перцепција за корупцијата. Ние имаме подобрување од 0,3 индекси поени, што реално е многу мал напредок“, рече Тасева. Таа појасни дека напредокот на една држава во однос на другите држави не мора да биде како резултат на подобрена перцепција, туку може да се должи на воведување на нови држави во табелата или на промена на методологијата на истражувањето.„Индексот на перцепција е релевантен. Кога државите ќе ја надминат границата од пет индексни поени, може да се смета дека направиле позначаен исчекор во борбата против корупцијата“, изјави Тасева.Таа потсети дека Македонија за прв пат во табелата на Транспаренси Интернешнл  била рангирана во 1999 година, кога се нашла на 63 место на табелата, со индекс на перцепција од 3,3.Најлошо Македонија била рангирана во 2003 година на 106 место, со индекс на перцепција од 2,3.Водечки држави на овогодишната табела се Данска, Нов Зеланд и Сингапур со индекс на перцепција од 9,3, пред Финска и Шведска, чиј индекс е 9,2.На дното на оваа табела се Сомалија (индекс 1,1), Мјанмар (1,4), Авганистан (1,4) и Ирак (1,5).Пад во резултатите во споредба со 2009 година бележат Чешка, Грција, Унгарија, Италија, Мадагаскар, Нигерија и САД, додека подобрување, покрај Македонија, оствариле Бутан, Чиле, Еквадор, Гамбија, Хаити, Јамајка, Кувајт и Катар.Индексот на перцепција на корупцијата за 2010 година покажува дека приближно три четвртини од 178 рангирани држави, имаат индекс под пет, што укажува на сериозни проблеми со корупцијата, се наведува во извештајот на Транспаренси Интернешнл. Овој индекс на Транспаренси се изработува врз база на комбинација на анкети и нацрти на податоци поврзани со корупција од експертски и бизнис истражувања, спроведени од различни реномирани институции.