Македонија
Георгиевски: Ако досиејата се точни, во 2001 владата била сменета со војна
Ако се докаже дека досиејата се точни, произлегува дека Владата на Љубчо Георгиевски била сменета со војна
Ова е констатација на поранешниот премиер и почесен претседател на ВМРО-Народна партија, Љубчо Георгиевски во интервју за бугарската новинска агенција Фокус. „Сметам дека досиејата кои што во моментов се актуелни во Македонија, се однесуваат на лидерите на Демократската унија за интеграции (ДУИ), кои беа и раководители на ОНА. Ова што се случува денес, најверојатно е поради финансиски бенефиции на оние кои ги даваат таквите документи. Самото појавување на поранешниот раководител на УДБА, кој јавно кажа дека постоеле такви досиеја и такви луѓе, ако погледнеме од политички аспект, повторно станува збор за дискредитирање на Србија. Мислам дека некој поранешен удбаш нема да си дозволи свесно да ја деградира политиката на Србија. Затоа сметам дека станува збор за приватни интереси, за некој кој платил за тие досиеја и некој кој ги купил овие досиеја. Тоа е моја проценка. Не е кажано, сепак дека е точна. Она што е интересно во целата историја е дека тие досиеја се однесуваат на луѓе кои за време на 2001 година ја направија војната во Македонија. Затоа мојата констатација е дека, ако излезе дека досиејата се точни, владата на Георгиевски во 2001 година била симната со војна“ вели Георгиевски. Во интервјуто, Георгиевски вели дека е изненаден од тоа што македонската влада многу малку работи на тоа, да ги побара досиејата од официјален Белград.„Повеќе слушаме дека Белград нема да ги даде, а официјално никој не ги ни побарал“, вели Георгиевски. Тој додава дека од расветлувањето на досиејата и на се што останало од 2001 г. имаат интерес и Македонците и Албанците, како и демократска Србија. „Сите треба да се бориме против тие стари структури кои сè уште ги контролираат нашите држави“ додава Георгиевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ЛДП в петок организира „Pet Friendly“ ден во канцеларијата „Либерално ќоше“
Во новоотворената канцеларија на ЛДП „Либерално ќоше“ во срцето на Скопје в петок од 18:00 часот ќе се одржи „Pet Friendly“ ден за дружење, разговори и идеи на граѓаните со претседателката на Либерално-демократската партија Моника Зајкова.
– Водејќи се од нашата совесност, свесност и одговорност, покренавме иницијатива за носење на нов закон за благосостојба на животните. Милениците, се семејство, не потрошен предмет и затоа секој сопственик кој го остава својот миленик на улица треба да сноси одговорност и да се обезбеди регулиран систем на одговорно одгледување и размножување. Воедно да се обезбедат соодветни услови за бездомните кучиња и мачки и при тоа да ги заштити граѓаните од несакани повреди, е пораката на Зајкова.
Граѓаните се добредојдени на петочното дружење заедно со своите миленици, а своите идеи и предлози може да ги споделат и во писмена форма.
На полето на заштита на животните, ЛДП до Собранието поднесе и предлог за изменување и дополнување на Законот за заштита и благосостојба на животните, којшто ќе воведе построги мерки против оставање животни на улица, поодговорно сопствеништво и ќе ги подобри нивните услови.
Скопје
„Маски, смеа, рингишпил- дојди во Шеговил!“ – голема забава под маски во Кисела Вода
Под слоганот „Маски, смеа, рингишпил- дојди во Шеговил!“ општина Кисела Вода, в понеделник, на први април, организира голема забава под маски за најмладите.
Пред салата Расадник ќе биде поставен забавен парк со најразлични реквизити, ќе има кловнови и аниматори, а за музичкиот дел се задолжени „Поточиња”.
Настанот започнува во 11 часот, а за изборот на најдобра маска ќе одлучи жири комисија од општината. Најдобрите маски ќе добијат награди, велат од општината и ги покануваат сите дечиња да дојдат во Шеговил и со своите насмевки, шеги и маски да поминат еден прекрасен ден.
Македонија
Ванковска: Преспанскиот и бугарскиот договор се колонизаторски договори
Професорката Билјана Ванковска и претседателски кандидат на Левица во Фејсбук статус истакнува дека има разочарани млади луѓе кои мислат дека кога политичарите говорат за прашањата за Преспа и другите договори, тоа е само губење време и одвлекување на вниманието од реалните проблеми на земјата, сиромаштијата, невработеноста, корупцијата и сл..
„Точно е! Мнозинството граѓани едвај врзуваат крај со крај, очајни се од непостоење здравствен или образовен систем, сакаат развој а не вртење кон минатото.
Она што овие млади (а инаку умни) луѓе уште не го научиле е дека геополитиката (која ни ја наметнаа) е тесно поврзана со геоекономијата. Би очекувала својот критички ум да го свртат кон, на пример, поврзаноста на нашата колонијална положба со Преспа и Митилинеос. Или дури и со Бехтел и Енка… и уште многу ситни и не толку ситни зделки на македонските компрадорски елити кои нѐ продадоа како на сточен пазар, ни ги одзедоа и идентитетот и достоинството, ама и ги наполнија своите џебови врз база на бајките за ЕУ интеграција со смена на името и уставот.
It’s all about geopolitics, stupid!“, пишува Ванковска.
Според неа, Преспа и Бугарскиот договор не се само национални, идентитетски прашања, туку и класни и социоекономски. Ние, додава таа, сме во класично ропство, а принудени да аплаудираме на колонизаторите кои не се тука за наше добро, туку за свои интереси.