Македонија
Приведен дилер на дрога во Кисела Вода

Дилер на дрога е фатен во скопската населба Кисела Вода, откако полицијата во неговиот стан откри 234,96 грама хероин.
Како што соопшти Министерството за внатрешни работи, 36. годишниот И.Б. во стан под кирија во населбата Кисела Вода продавал паковки со хероин, по цена од 1.000 денари за еден грам.
При претресот на домот, биле пронајдени 33 полиетиленски паковки со наркотична дрога хероин во вкупна маса од 230,2 грама, една дигитална вага, една лажичка и ножици со траги од хероин, како и 1.500 евра и 10.000,00 денари, по што И.Б. е приведен од страна на полициските службеници.
Инаку, пријавениот И.Б. е евидентиран како извршител на повеќе кривични дела. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Шанса за Центар – Независни заедно“: Во Центар останавме без лого на гласачките ливчиња

На избирачките места во општина Центар е утврдено дека на избирачкиот материјал — листите со кандидати за градоначалници и советници — недостасува логото на независните кандидати од граѓанската иницијатива „Шанса за Центар – Независни заедно“.
Според соопштението од иницијативата, логото не е испечатено кај Група избирачи Јане Димески на листата за советници и кај Група избирачи Билјана Ивановска на листата за градоначалници.
Од „Шанса за Центар“ наведуваат дека со ова е направена, како што велат, флагрантна дискриминација и повреда на членовите 97 став 1 и 98 став 1 од Изборниот законик, со што нивните кандидати се ставени во нерамноправна положба и е поништена еднаквоста на избирачкото право.
Неправилноста, според нив, е констатирана на целата територија на општина Центар и може да претставува основа за поништување на изборите во оваа општина.
Иницијативата информира дека се обидела да поднесе приговор преку електронската форма на страницата на Државната изборна комисија, но системот не функционирал во моментот на поднесувањето.
„Поднесен е приговор по електронски пат преку електронска пошта и во архивата на ДИК“, се наведува во соопштението.
Македонија
Милошоски: Време е за промени, очекуваме победа во Струмица

Од бројот на излезени гласачи, очекуваме дека струмичани ќе одлучат за промена и за нов градоначалник. Доволно долго време, 20 години, општината беше фамилијаризирана од една мала група на луѓе и сметаме дека е време, да се даде шанса на едно ново раководство, кое што ќе обединува и во Струмица, и ќе ги обединува и граѓаните и проектите кои што се потребни, изјави Антонијо Милошоски, член на ИК на ВМРО-ДПМНЕ.
„Она што го очекуваме, во 19:00 или 20:00 часот е политичкиот конкурент на нашиот кандидат, да биде доблесен, да ја честита победата, и да не бара никакви изговори за резултатот кој што сите го очекуваме. Како сериозна партија, нормално дека имаме повеќе опции, првата опција е да победиме со 4.000 разлика, втората опција е да победиме со 3.000 разлика, третата опција е победиме со 2 и пол илјади разлика, по однос на другиот кандидат. Во секој случај, Струмица вечерва ќе има добра причина за да прослави, и од утре да се зафати со решавање на многуте проблеми со кои што струмичани се соочуваат“, рече тој.
Македонија
Сиљановска – Давкова: Посакувам она што денеска го видов: една досадна граѓанска изборна слика, да се повтори и во вториот круг

Претседателката Гордана Сиљановска – Давкова денеска гласаше на локалните избори. Во објава на социјалните мрежи таа напиша дека посакува она што денеска го видела, една досадна граѓанска изборна слика, да се повтори и во вториот круг.
„Очекувам триесетгодишното изборно искуство да се повтори: пристојни, фер и демократски избори. Ја извршив мојата граѓанска обврска, верувам дека тоа ќе го сторат и другите граѓани. Посакувам она што денеска го видов: една досадна граѓанска изборна слика, да се повтори и во вториот круг“, објави Сиљановска – Давкова.