Македонија
Економски факултет слави 60 години

Еден од најстарите факултети во Македонија, Економски факултет- Скопје, деновиве прославува 60 години од своето постоење. По тој повод ќе се одржат повеќе настани: доделување дипломи, средба на генерации како и голема меѓународна конференција на тема “Предизвиците за Економската теорија и политика во периодот по глобалната економска криза“. На конференцијата ќе земат учество 40-тина експерти, од различни страни на светот, а ќе се одржи на Економскиот факултет- Скопје на 12-ти и 13-ти ноември.Основан како петти Факултет во рамките на Универзитетот “ Св. Кирил и Методиј “ Скопје, меѓу првите три економски факултети во поранешна Југославија,Економскиот факултет Скопје до денес ја потврди својата улога на континуиран извор на високо стручен кадар од областа на економијата и бизнисот во Република Македонија, велат од Факултетот. “Економски факултет е институција за оние млади луѓе кои знаат и веруваат дека знаењето е основа на која се потпира животот. Во своето постоење факултетот покажал дека од обични студенти создава карактерни и успешни луѓе кои знаењето лесно го претвораат во мудрост за среќен живот. Факултетот, низ сиве овие години, создаде елита која е препознатлива во сите области на економскиот живот. Со гордост можеме да речеме дека за овие 60 години од своето постоење, Економскиот факултет создал многу бизнисмени, менаџери, успешни лидери, но пред се професионалци во права смисла на зборот”, вели деканот проф. д-р Благоја Ѓорѓијовски.Од основањето до денес на Економскиот факултет во Скопје дипломирале над 17.000 студенти, 800 лица се стекнале со степен магистри, а околу 174 станале доктори на економски науки. /крај/пд
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
МВР: Во целост ја гарантираме безбедноста на граѓаните во насока на спроведување на фер и демократски „Локални избори 2025“

Министерството за внатрешни работи во пресрет на „Локални избори 2025“ континуирано презема мерки и активности во рамки на своите надлежности со цел непречено и безбедно спроведување на изборниот процес.
„Согласно направените проценки и воспоставените планови на денот на изборите полициските службеници ќе бидат присутни во близина на локациите на избирачките места, како и на клучните сообраќајни точки, со цел зголемена ефикасност и навремено откривање на можни нарушувања на јавниот ред и мир. Безбедноста на граѓаните ќе биде гарантирана со стандардните материјално технички средства, мобилни тимови и пунктовско работење, а ќе се користи и современа технологија – дронови за воздушна контрола со цел побрза реакција и преземање на соодветни мерки и активности во случај на инциденти“, велат од Министерството за внатрешни работи.
МВР апелира до сите граѓани и до политичките партии, да придонесат за мирна и демократска атмосфера, да ги почитуваат упатствата на полициските службеници и да се воздржат од било какви активности кои би можеле да го нарушат изборниот процес.
Во текот на изборниот ден, МВР соодветно ќе ја информира јавноста за одвивањето на изборниот процес.
Македонија
Филипче: Прочитан е Мицкоски, обидот за партизација на судството нема да помине

„На Мицкоски му одговара партизирано судство преку кое ќе може да влијае на одлуките, и тоа не е ништо ново, граѓаните веќе го виделе тоа, а некои и го почувствувале на своја кожа“, истакна претседателот на СДСМ Венко Филипче на граѓанскиот собир „Се бориме за нашиот дом“ во Чучер Сандево.
Филипче нагласи дека Мицкоски очигледно нема волја за реформа на судството, а одговорноста е исклучиво само кај него.
„Од уста не ги вади обвинителите, судиите, на кои им се закануваше јавно дека ќе ги избрка, дека ќе ги замени со други, дека не ја заслужуваат платата, но ништо суштински не презема за да се реформира правосудството. Театрални изјави без ниту еден донесен закон од реформската агенда за вистинско реформирање на правосудниот систем“, рече Филипче, додавајќи дека оваа власт не мисли добро на народот и државата.
„Власта на ВМРО-ДПМНЕ ја турка државата назад – во изолација, хаос и страв. Тие не нудат визија, нема иднина, го нудат минато. Го партизираат секој систем, ги злоупотребуваат институциите, ги забораваат граѓаните. Наместо ред и развој, ароганција, луксуз, корупција“, рече Филипче, нагласувајќи дека борбата за нашиот дом е борба за вредности и достоинство.
„Македонија не се брани со пароли и навреди, туку со резултати, со силни институции и со чесна власт. Овој патриотизам на Мицкоски со викање, навреди, поделби на народот и национализам не може да донесе ништо добро на државата и граѓаните. И токму затоа, СДСМ мора повторно да стане гласот на разумот, на народот и на иднината. Да ја врати државата таму каде што ѝ е местото — во рацете на граѓаните“, порача претседателот на СДСМ Венко Филипче од граѓанскиот собир во Чучер Сандево.
Македонија
Без струја делови од Кисела Вода

Од ЕВН Македонија АД известуваат дека денеска без електрична енергија ќе останат:
– во периодот од 09.00 до 12.00 часот, дел од корисниците од ул. 1523, објектите на фирмите Пастор, Орнамакс и други во нивна близина, корисниците од бул. Борис Трајковски од бр. 77 до бр. 85, како и корисниците лоцирани помеѓу објектите на фирмите Циле Инжињеринг и Интеграф. (општина Кисела Вода)