Македонија
ЈСП потврди дека ќе управува со жичницата

Немаме сеуште потпишано договор дека ние ќе управуваме со жичницата, но бидејќи сме најспремно претпријатие кое располага со целосната опрема и има доволен и професионален кадар, Јавното сообраќајно претпријатие ќе биде компанијата кое ќе управува со жичницата, рече директорот на ЈСП, Мишо Николов. Тој додаде дека за да може одредено претпријатие да управува со жичницата потребно е да има доволен број на инжинери, машински и електро, како и техничари. Николов додаде дека персоналот кој ќе работи на жичницата ќе биде спремен во секој момент да реагира, односно ќе почне со обуки од секаков вид, од спасување на патници, до нивно пренесување во болници и давање на прва помош ако тоа биде потребно. Тој додаде дека е можно со жичницата да управува „ЈСП Турс“ кој ќе организира и тури до Средно Водно во кои ќе се опфати и прошетка со жичницата. Не планираме да имаме нови вработувања за во жичницата, но потребни ни се уште 25 возачи на автобуси за кои набрзо ќе распишеме конкурс. „За некој да се вработи како возач на автобус потреби се многу прегледи, како психолошки, така и медицински бидејќи мора да се изберат луѓе кои ќе знаеме дека патниците безбедно ќе ги однесат до одредената локација“, рече Николов.За пуштање во употреба на автобуска линија од Скопје до Аеродромот „Александар Велики“, сеуште траеле преговорите, кои се одвивале многу тешко.„Турски ТАВ имаше замисла сам да организира ваква линија, но нивната фирма се откажа. Сега сме ние во преговори со нив, но тие тешко се одвиваат бидејќи ТАВ сака да им плаќаме одредена сума што ќе ја користиме трасата, а ние сметаме дека тие треба да ни плаќаат што ние ќе ја одржуваме“, вели Николов. За пристигнувањето на новите украински автобуси, Николов рече дека не сака да шпекулира со факторот време, но очекува дека тие ќе пристигнат најдоцна до Нова Година. Тој додаде и дека за украинските едноподни автобуси сервисот ќе биде во Скопје и со нив ќе управува ЈСП, а додека за кинеските можно е и самата кинеска фирма да отвори свој сервис тука./крај/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Муцунски на настан на Атлантскиот совет: Потребна е забрзана интеграција

На покана на Јерн Фленк, директор на Атлантскиот совет, министерот за надворешни работи и надворешна трговија, Тимчо Муцунски, денеска учествуваше на настан организиран од Советот, кој се одржа во просториите на Министерството за надворешни работи и надворешна трговија.
Покрај министерот Муцунски, на настанот се обратија и министерката за европски прашања на Црна Гора, Маида Горчевиќ, како и претставници Делегацијата на Европската Унија, невладиниот сектор и самиот Атлантски совет.
Во своето обраќање, министерот Муцунски ја нагласи потребата од одлучна и доследна поддршка за реформските процеси во регионот. Посебен акцент стави на Планот за раст како практичен инструмент кој го забрзува приближувањето кон единствениот европски пазар и носи реални економски придобивки за граѓаните – уште пред полноправното членство.
Министерот подвлече дека реформите мора да бидат препознаени и вреднувани од страна на Европската Унија преку конкретни и навремени чекори, со цел зачувување на кредибилноста на процесот на проширување и спречување на дополнително разочарување кај граѓаните. Тој истакна дека реформските процеси се потврда за јасната европска ориентација на Владата, и дека нивното спроведување не претставува само исполнување на агенда, туку реално подобрување на квалитетот на животот и на општеството во целина.
Во завршницата на обраќањето, министерот Муцунски, во контекст на денешниот Самит, ја повтори пораката дека Западниот Балкан е составен дел од Европската Унија и дека европската целина ќе биде комплетна само ако земјите од регионот станат нејзин дел. Тој упати повик за забрзана интеграција на регионот, што ќе значи и вистинска европеизација на овој дел од континентот.
Македонија
Сиљановска-Давкова се сретна со шпанскиот премиер Педро Санчез

Претседателката Гордана Сиљановска-Давкова, во рамки на учеството на 4. Меѓународна конференција за финансирање на развојот во Севиља оствари средба со премиерот на Кралството Шпанија, Педро Санчез.
Осврнувајќи се на нашите евроинтеграции, Сиљановска-Давкова посочи на тешките македонски компромиси коишто треба да бидат соодветно вреднувани од Европската Унија и истакна дека влезот во ЕУ ќе биде корисен и за самата Унија, и за земјите кандидати коишто дополнително ќе ја стабилизираат.
Таа оцени дека Шпанија е важен партнер на земјава во рамки на НАТО, ООН, ОБСЕ и изрази благодарност до владата на Санчез и Шпанија за доследната поддршка на македонските аспирации за членство во Европската Унија.
Реафирмирајќи ја посветеноста на државава кон евроинтегративниот пат, Сиљановска-Давкова ја повтори позицијата дека билатералните прашања не треба да бидат пречка во пристапниот процес. Имајќи ги предвид турбулентните геополитички процеси во светот, таа укажа на потребата од одржување на кредибилитетот на политиката на проширување и нагласи дека регионов кој историски, географски и културно припаѓа на ЕУ, треба што поскоро да се интегрира во европското семејство.
Претседателката со задоволство ја прими информацијата од премиерот Санчез дека Шпанија е заинтересирана за зголемена економска соработка во делот на туризмот, инфраструктурата, земјоделието, енергетиката, соларната енергија и управувањето со водните ресурси.
Двајцата соговорници разговараа за соодветно одбележување на учеството на македонски борци во Шпанската граѓанска војна.
Македонија
Муртезани-Старовиќ: изразена подготвеност за заедничко делување кон целосна европска интеграција на двете земји

Министерот за европски прашања, Орхан Муртезани, денеска на маргините на Самитот посветен на Планот за раст на ЕУ што се одржува во Скопје, оствари билатерална средба со министерот за европски интеграции на Република Србија, Немања Старовиќ. Во оваа прилика, Муртезани му честиташе на министерот Старовиќ за неодамнешното именување на функцијата и изрази уверување дека заедничките напори ќе продолжат со нова динамика и проактивност во насока на унапредување на европската агенда на регионот.
Муртезани и Старовиќ разговараа за продлабочување на билатералната соработка, особено во контекст на спроведувањето на Планот за раст, кој претставува заедничка можност за засилување на регионалната економска поврзаност и приближување кон европските политики. Посебен акцент беше ставен на досегашната соработка врз основа на Меморандумот за разбирање меѓу двете министерства, како и на новите можности за иницијативи од заемен интерес, вклучително и прекуграничните програми за развој и инфраструктурно поврзување.
Министрите го нагласија значењето на доследна и координирана примена на европските реформи во регионот, како предуслов за реализација на економските и институционалните придобивки предвидени со новиот пристап на ЕУ. Во таа насока, беше изразена заедничка подготвеност за продолжување на блиската комуникација и заедничко делување кон целосна европска интеграција на двете земји.