Истражувањата покажуваат дека, за жал, кај нас младите во сексуалниот и репродуктивниот период влегуваат неподготвени, без доволно информации.

Со ваков став излезе министерот за здравство Бујар Османи, кој присуствуваше на промоцијата на Советувалиштата за млади за сексуално и репродуктивно здравје кои се отворени од страна на Министерството за здравство во 19 градови.

Тој додаде дека основна цел на овој проект е да се подобри достапноста, брзината и точноста на информациите за сексуалното здравје, сексуално преносливите болести, заштита од несаканата бременост.

Во овие 19 советувалишта, кои се дел од центрите за јавно здравје, стручни лица ќе даваат бесплатни совети и контрацептивни средства.

„Ова е само еден континуитет на мерки и активности кои што се спроведуваат од страна на МОН во основното образование и едно логично продолжение на овие мерки во рамките на предметот „Животни вештини“, во кој учениците се подучувани за сексуалното и репродуктивно здравје. Но исто така, се подучувани и за сексуалното вознемирување за да препознаат што е тоа педофилија и да бидат свесни за сексуалните разлики“, рече министерот за образование и наука Никола Тодоров.

Тодоров рече дека е свесен дека во Македонија сè уште постојат определени предрасуди кај младите за поставување на таков тип на прашања, но дека се надева дека денешната иницијатива ќе им овозможи на адолесцентите да прашаат за сè она што им треба.

Првиот настан во оваа кампања беше организиран во форма на телевизиска емисија и им беше претставен денес на средношколците од скопската гимназија „Никола Карев“, а караванот ќе продолжи низ Битола, Охрид, Тетово и Кочани./крај/ми