Сопственикот на А1 телевизија, Велија Рамковски  наредил од програмата да се симнат снимките од вечерта кога зградата во која е сместена телевизијата беше опколена со полицајци, а за изјавите за парите кои ги добил од премиерот вели дека биле дадени во афект.

Ова го изјавил Рамковски во вчерашното интервју во емисијата „Патот кон…“ емитувано на телевизијата Алсат – М.

„Во тој налет, во таа еуфорија, во тој би рекол специфичен психолошки момент, траеше тој афект подолго време од 25 ( ноември) и ние мислам претеравме. Мислам дека и новинарството се претера. Гледачот информирај го! Мислам дека тука згрешивме. Затоа го прекинуваме сега и повикуваме многу чисто и јасно инспекциите да си ја продолжат несметано својата работа. Нема што да криеме“ изјавил Рамковски.

Околу парите во кеш за кои јавно тврдеше дека премиерот Никола Груевски му ги плаќал за партиски реклами на ВМРО-ДПМНЕ, Рамковски сега вели дека тоа се случувало во афектна состојба.

„Би рекол дека тоа беше страшен афект! Револт беше, јас немам поим на кого се и чиј е тој кеш.  Ама вчера точно преку маркетинг службата даде известување преку ’Шпиц’, ’Време’ и А1 колку пари од буџетот владата плати за рекламирање на ВМРО-ДПМНЕ. Парламентарните избори 2006, 2008, локалните избори 2009, претседателските избори 2009 целосно се платени од буџетот…. Никој пат јас не сум земал кеш, ниту денар, ниту евро “ вели Рамковски.

Во разговорот, Рамковски негира дека е поврзан со шесте фирми на истата адреса со телевизијата преку кои Управата за јавни приходи и Финансиската полиција се сомневаат дека од земјава се испумпани неоданочени 7,5 милиони евра.

„Што можам јас да направам? Не е мое да правам или да не правам. Ако се најде криминал во одредени фирми каде што си има основачи, си има директори , немам јас што да правам, законот ќе си ја прави својата работа!“ додава Рамковски./крај/алсат – м/фф