Одредувањето на датум за старт на пристапни преговори на Македонија со Европската Унија на декемврискиот самит на Европскиот Совет позитивно би влијаело на напорите за изнаоѓање на решение во спорот со името со Грција.Ова пред членовите на собраниската Комисија за надворешна политика го истакна шефот на македонската дипломатија, Антонио Милошоски. Тој реферираше за активностите во делот на надворешната политика во текот на изминатата година, ставајќи акцент на шест-месечното претседателство со Комитетот на министри на Советот на Европа, годишниот извештај на Европската Комисија за напредокот на земјата, самитот на НАТО во Лисабон, како и односите на Македонија со земјите од регионот, Европа и Светот. Во однос на недобивањето на датум за старт на преговори пет години по стекнувањето на кандидатскиот статус, Милошоски со став – оваа состојба е неодржлива. „Ваквата статусна состојба не е долгорочно одржлива и како земја кандидат која што следниот месец ќе воспостави целосна трговска асоцијација со Европската Унија согласно спогодбата за стабилизација и придружување , така и во однос на кредибилитетот на Европската Унија и политиката на проширување која што  се покажа како најуспешна мировна политика на овој континент, но и политика за економски напредок и пријателство“, рече Милошоски.Шефот на дипломатијата отворено изрази очекува европските институции, како што рече, да ги олеснат создавањето на неопходните политички импулси во однос на потрагата по решение на спорот со името.„Затоа ние апелираме до нашите европски партнери дека донесувањето на одлука за почеток на преговори со Република Македонија овој декември би имала токму таков ефект – да се даде неопходниот политички импулс за зајакнување на довербата за возвратни активности во духот на европската соработка и добрососедските односи и за создавање на неопходната позитивна клима во меѓусебните македонско-грчки односи за изнаоѓање на применливо и неодржливо решение за спорното прашање наметнато од страна на Република Грција“, рече Милошоски.Дел од пратениците како скудна ја оценија годишната анализа на министерот Милошоски. Во изјавата на шефот на дипломатијата препознаа монотони фрази, со кои, според нив, се потврдувала статус кво ситуацијата во која се наоѓа дипломатијата. „Мислам дека третманот и на оваа престижна комисија и воопшто третманот на владата кон парламентот е несоодветен. Вие не може да ги решите проблемите ако не бидете отворени и ако не побарате од нас поддршка. Ние не може на невидено да ве поддржиме кога гледаме дека петта година сте непродуктивни. На крајот се бројат резултатите“, рече пратеникот Владо Бучковски од СДСМ.„Мислам дека тука нема ништо ново во ова излагање, не нуди решенија, ни нуди само фрази кои што се монотони, кои што имаат за цел да ја стабилизираат и смират ситуацијата во статусот во кој што се наоѓаме. На некој начин тие фрази се обид за покривање на очајот во кој што е Република Македонија“, рече Ѓорги Оровчанец од Нова Алтернатива.Дел од пратениците, пак, побараа создавање на државна позиција врз основа на консензус во однос на проблемот со Грција.„Треба да размислиме што ако следните 50 години Република Грција инсистира на ова радикално решение – едно име за севкупна употреба. Што тогаш? Сите знаеме дека тоа не е решение, не е предлогот кој ниту може да се прифати, ниту да се направи реален компромис. Затоа мислам дека како почеток на решавање на оваа пат-позиција треба да биде изградба на консензус помеѓу сите нас, добронамерно, коректно, со толеранција, со почитување на различностите на меѓу нас“, изјави Лилјана Поповска, пратеник од ДОМ.„Самото претседавање со Советот на Европа е можеби најдобриот демант за квалификацијата изолирана земја. Сепак, претседавањето со оваа организација, одржувањето на конференции во Република Македонија и во Стразбур е доволен доказ дека Република Македонија проактивно учествува во меѓународниот дипломатски и политички живот во организациите кои што играат важна улога на европскиот континент“, одговори Милошоски.Тој, исто така, рече дека министерството нема ништо против создавањето на заедничка стратегија во однос на спорот со името доколку, според него, се создадат услови за нејзино едногласно носење. /крај/ач