Се очекуваат разни сценарија на протестниот марш на опозицијата, но ВМРО-ДПМНЕ нема да дозволи да биде вовлечена, изјави на денешната прес конференција Александар Бичиклиски, портпарол на владејачката партија.

Оценувајќи дека политичката дебата во земјата е падната на најниско ниво, и дека притоа  се прават разни конструкции и сценарија, Бичиклиски нагласи дека ваквата ситуација кулминирала со изјавата на лидерот на опозицискиот СДСМ, Бранко Црвенковски, којашто ја карактеризираше како примерна „за шеф на мафија, а не лидер на опозиција или својствена за водач латино-американски картел“.

Бичиклиски притоа цитираше изјава на Црвенковски дадена за емисијата „Во центар“ во којашто на прашање на новинарот Васко Ефтов, за кого рече дека дејствува како „несуден генерален секретар на СДСМ“, за наводен план за атентат врз него, Бранко Црвенковски одговори – „Што може да им порачам, нека гледаат да не ме промашат, затоа што ако ме промашат во следната прилика тие нема да бидат промашени”.

Тој нагласи дека станува збор за ниска и провидна политичка манипулација, што, како што рече е дел од сценариото „подготвено од двоецот Црвенковски-Рамковски“.

„И ако кога најавуваа жешка политичка есен мислеа на ова сценарио коешто сега ни го подготвија, тогаш можеме да им порачаме дека се навистина провидни“, рече портпаролот на ВМРО-ДПМНЕ, според кого оваа политичка игра има две цели во заднината.

Првата цел, според Бичиклиски, е да се дефокусира јавното мислење од аферата „Надеж“ во којашто, според него, е инволвиран Бранко Црвенковски.

„И втората заднина на ова сценарио е да се дефокусира вниманието од контролата на инспекциските служби во фирмите на улица Перо Наков бб, поради основаното сомневање за криминални активности, фирми со кои Велија Рамковски, признава, па не признава своја поврзаност“, додаде Бичиклиски. /крај/со/сн