Доколку постои подобра инфраструктура и услови за безбедно користење на велосипедот како превозно средство, би поттикнало повеќе граѓани да одат на работа со велосипед, покажува истражувањето на здружението „Коалиција за одржлив развој“.Истражувањето чија цел е промоција на иницијативата „На работа со велосипед е во ред“, покажува дека лицата постари од 55 години повеќе го користат велосипедот како превозно средство, за разлика од другите старосни групи. Жените се повеќе подготвени да одат на работа со велосипед за разлика од мажите кои дури 34 проценти го користат автомобилот како единствено превозно средство.Од вкупниот број на испитаници, истражувањето покажува дека 33 проценти од испитаниците го користат автомобилот како примарно превозно средство. Интересно е дека веднаш зад нив се велосипедистите и пешаците. Потоа доаѓа јавниот превоз, а најмал број граѓани користат такси превоз за да стигнат до работното место. Скопјани би оделе на работа со велосипед доколку се создадат безбедни велосипедски патеки и паркиралишта за велосипеди на работното место. Освен тоа тие сметаат дека работодавачите треба да создадат финансиски и нематеријални субвенции, како на пример службен велосипед, а би се одлучиле за велосипед доколку тие се поефтини, доколку постои поголема сообраќајна култура и  доколку се зголеми свеста кај граѓаните за нивно користење.Во истражувањето кое траеше два месеци беа опфатени 730 граѓани, вработени во приватни компании, јавни претпријатија, образовни институции, јавна администрација и  невладини организации.Здружението Коалиција за одржлив развој има за цел да ја промовира иницијативата „На работа со велосипед“ која подоцна ќе прерасне во поширока кампања за подигнување на свеста на граѓаните, бизнис компаниите и јавните институции за концептот за одржлива урбана средина. крај/к.с