Министрите за одбрана на Македонија и Турција, Зоран Коњановски и Веџди Ѓонул на денешната средба во Скопје констатираа добра соработка меѓу двете земји на воен и одбранбен план. Според Коњановски, фактот што Турција досега на Македонија и има доделено околу 16 милиони евра помош, е најдобар доказ дека оваа земја е една од нашите најважни партнери. Двете министерства денеска склучија нов договор за воено-финансиска соработка вреден 1,4 милиони турски лири (околу 900.000 долари). „Не постои средба каде што учествуваме ние како министри за одбрана, а господинот Веџди Ѓонул да не земе збор и да ја поддржи Република Македонија. Сакам уште еднаш да нагласам дека недвосмислено нашиот пат продолжува кон НАТО интегративниот процес. Ние сакаме што поскоро да бидеме дел од НАТО и на тој пат и понатаму ќе ни бидат потребни пријатели. Ние знаеме дека еден од најсилните поддржувачи и најсилните партнери кои даваат и ќе ни даваат поддршка на тој пат кон НАТО е Република Турција“, изјави Коњановски.Ѓонул, од своја страна, пак, вети дека Турција и понатаму е подготвена да ги сподели своите искуства на воено-одбранбен план со Македонија.„Турција е првата земја која што ја призна Република Македонија и која што прва испрати амбасадор во Република Македонија, дотолку повеќе што Република Турција ја призна Република Македонија под нејзиното илјадагодишно име, а не со некоја кратенка. Денеска со задоволство гледаме дека Република Македонија во европски рамки се докажа со напредната демократија, со извонредни стандарди, со воени стандарди и со други развојни можности кои се мерливи со сите други напредни земји во Европа и регионот“, рече Ѓонул.Ѓонул, кој ќе се сретне и со претседателот Ѓорге Иванов и премиерот Никола Груевски, попладнево ќе го посети Техничкиот ремонтен центар, каде што ќе биде предадена турска донација за потребите на АРМ, вредна околу 253.000 долари. /крај/ач