Хируршките зафати над жртвите на трговијата со органи за време на воениот период на Косово од 1998 до 1999 година биле изведувани во здравствените домови и болниците во Албанија, покажува истрагата на српското обвинителство за воени злосторства, пишува денешна „Политика“, а јавува Бета.

Весникот пишува дека како еден од доказите, српското обвинителство ја наведува изјавата на шефот на одделението за трансплантација на клиничко-болничкиот центар „Мајка Тереза“ во Тирана, Сулејман Кодра.

Тој за „ТВ Топ њуз“ од Тирана изјави дека во таа болница се забележани случаи на пресадување органи од непознати донатори, но дека хирурзите може да се сметаат одговорни за тоа.

Обвинителството за воени злосторства на Србија дошло и до информации за бројот на пациенти со тешка инсуфициенција на бубрези кој за време на воениот период на Косово биле на третман во Албанија и Македонија.

Во клиничкиот центар „Мајка Тереза“ во Тирана во текот на 1999 година биле примени 75 пациенти од Косово додека во Универзитетската болница во Скопје со дијагноза тешка инсуфициенција на бубрези биле примени 70 пациенти од Косово и Метохија, пишува „Политика“.

Во Тирана биле направени неколку пресадувања на бубрези. Во истата болница од 75 пациенти биле задржани 35, додека останатите биле пренесени во Италија (25), Австрија (15), каде чекале на пресадување.

Како што пренесува белградскиот весник, за потребите на вадење на органите користени биле и дел од болниците во касарната „Бајрам Цури“, здравствениот дом во фабриката „Кока – Кола“ во Тирана, невропсихијатриската болница во затворот број 320 во местото Бурељ и приватната куќа адаптирана во болница во близина на местото Тропоја, озлогласената „жолта куќа“.

Покрај локациите, српското обвинителство располага со податоци дека постоел и илегален затвор во рудникот Дева, кој се наоѓа во пограничниот дел меѓу Косово и Албанија, едниот крај на тунелот е на Косово, а другиот во Албанија.

Обвинителството за воени злосторства дошло до овие податоци со истрагата на случајот „33-08“, под работен наслов „Трговија со човечки органи“.

Предметот е отворен пред две години, за да се проверат тврдењата кои поранешната главна обвинителка на Хашкиот трибунал, Карла дел Понте ги изнесе во својата книга.

„Политика“ наведува дека постои сомнение дека масовни гробници се наоѓаат во близина на Тропоја, во рудникот Дева од албанската страна и во близина на т.н. жолта куќа, наведува „Политика“./крај/бета/фф