Македонија
МВР распиша интерна потерница по синот на Рамковски
Министерството за внатрешни работи распиша интерна потерница по синот на Велија Рамковски, кој се уште е недостапен за истражните органи, информираат од МВР.
Потерницата е распишана бидејќи полицијата имала оперативни сознанија и информации дека лицето по кое што се трага се уште се крие на локации низ Македонија.
Освен по синот на Рамковски полицијата трага и по другите странски државјани кои беа опфатени со кривичната пријава за случајот „Пајажина“, а се во бегство.
За овие лица полицијата имала сознанија дека се надвор од Македонија. Доколку МВР добие наредба од судот по нив ќе биде распишана меѓународна потерница преку Интерпол.
„Оперативниот штаб кој беше отворен за координација и реализација на криминалистичката обработка “Пајажина“ ќе продолжи да функционира и во иднина бидејќи, според сознанијата со кои располагаат истражните органи, многу е веројатно дека кривичните дела и стекнатата противправна имотна корист се само мал дел од случувањата во десетиците фирми регистрирани на улицата „Перо Наков“. Службените лица кои денононоќно, поделени во повеќе тимови, работеа во оперативниот штаб, денеска имаа прв слободен викенд“ се вели во соопштението на Министерството за внатрешни работи.
Истражниот судија синоќа пред полноќ по десетчасовен распит им одреди триесетдневен притвор на 14 од осомничените меѓу кои и сопственикот на А1 телевизија, Велија Рамковски, неговата ќерка, директорката на А1 телевизија, како и поранешниот директор на А1 телевизија. Притвор во отсуство му беше одреден и на неговиот син и на уште четворица странски државјани.
Доцна синоќа осомничените беа пренесени во истражниот затвор во Шутка. Дел од притворените се бранеле со молчење, а дел дале исказ пред истражниот судија.
Во акцијата која што полицијата ја нарече „Пајажина“ се осомничени вкупно 23 лица. Тие се сомничат за злосторничко здружување, даночно затајување, перење пари. Според органите на прогонот, десет фирми нелегално заработиле околу 18 милиони евра, а со неплаќањето данок државниот буџет го оштетиле за околу 4 милиони евра./крај/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Дел од општина Ѓорче Петров денеска без струја
Од ЕВН Македонија известуваат дека денеска без електрична енегија ќе останат:
– во периодот од 09.00 до 13.00 часот, дел од корисниците од село Орман улица 5, општина Ѓорче Петров.
Македонија
Претежно облачно и тивко, максималната температура до 17 степени
Времето денеска ќе биде прeтежно облачно. По одделни котлини ќе има услови за појава на утринска магла. Ќе дува слаб ветер претежно од јужен правец. Минималната температура ќе биде во интервал од -4 до 2, а максималната ќе достигне од 12 до 17 степени.
Во Скопје, претежно облачно и тивко. Во делови од котлината ќе има услови за појава на утринска магла. Минималната температура ќе се спушти до 0, а максималната ќе достигне до 16 степени.
Времето во наредните денови
Под влијание на поле на висок воздушен притисок, следува период на стабилно и суво време, освен во четврток кога ќе има услови за слаб локален дожд. Во четврток и петок ќе дува умерен, повремено засилен ветер од северозападен правец кој ќе биде поизразен долж Повардарието.
Македонија
Сиљановска-Давкова: Состојбата е стабилна и нема опасност по безбедноста
Не сме изложени на нестабилност и нема опасност по безбедноста внатре и во регионот. Систем за предупредување постои, институциите ја следат состојбата, се координираат и оттаму е оваа оценка за стабилност и безбедност, изјави претседателката Гордана Сиљановска-Давкова по седницата на Советот за безбедност на која на дневен ред беше безбедносната состојба во земјава по најновите случувања на Блискиот Исток.

Таа додаде дека институциите ќе продолжат да ја следат состојбата.
-Координирани сме и со органите во регионот и ќе споделиме информации, најави претседателката Сиљановска – Давкова.
Претседателката Сиљановска Давкова е претседател на Советот за безбедност, а на седницата присуствуваа и членовите на Советот за безбедност: претседателот на Собранието Африм Гаши, претседателот на Владата Христијан Мицкоски, министерот за внатрешни работи Панче Тошковски, министерот за одбрана Владо Мисајловски како и експертите Џевдет Хајредини, Малинка Ристевска Јорданова, и Владо Спиридонов. Министерот за надворешни работи и надворешна трговија,Тимчо Муцунски, кој е на пат за САД, на седницата беше вклучен преку видеоврска.

На седницата присутни беа и директорката на Агенцијата за разузнавање, Габриела Јаковлева, директорот на Агенцијата за национална безбедност, Бојан Христовски и началникот на Генералштабот, генерал – мајор Сашко Лафчиски.

