Зоран Георгиевски, татко на 8-годишната Марија која почина на Инфективната клиника во Скопје, јавно побара да се открие вистината за минатонеделната трагедија. Како што рече денеска пред новинарите Зоран Георгиевски, тој веќе имал средба со министерот за здравство Бујар Османи, од кого добил ветување дека ќе биде формирана специјална комисија којашто ќе го испита случајот од 24. и 25 декември, кога почина неговата осумгодишна ќеркичка  Марија.Иако претходно веднаш по трагичниот настан, таткото Зоран Георгиевски рече дека нема да ја тужи Клиниката за инфективни болести при Клиничкиот центар Скопје, тој денеска најави дека ќе поднесе тужба за да ја дознае причината за смртта на неговата ќеркичка.Според кажувањето на Зоран Георгиевски, Марија на 24-ти декември била примена на Поликлиниката Чаир со зголемена телесна температура, а од таму била итно префрлена на  Клиниката за инфективни болести. „За време на третманот на Клиниката, во тие три-четири часови, беше примена од д-р Благица Јоксимовиќ, која воопшто не се качи за да ја види состојбата на детето. Како може детето да е во кома, а ниту еден од лекарите да не дојде да ја провери неговата состојба“, рече Зоран Георгиевски. Лекарката, извесна д-р Милена, според зборовите на Георгиевски, кога ја видела состојбата на девојчето се заангажирала и Марија била префрлена во соба за интензивна нега.Околу 22 часот вечерта девојчето била приклучено на кислород, а таткото бил испратен дома со уверување дека ќе биде известен за секоја промена на ситуацијата.Тој вечерта веќе на 25-ти декември, околу три часот повторно дошол на Клиниката и видел дека детето е веќе приклучено на апарати. Како што вели Георгиевски, на неговите прашања што се случува со Марија, му било одговорено дека се уште не се знае и дека се вршат испитувањата. „Дури и дадоа и „тамифлу“ затоа што според нив имало индиции дека станува збор за свински грип“, рече Георгиевски. „Како може да не се знае што му е на детето. Зошто не се направени лекарски снимки на белите дробови за да се види колкаво е воспалението на белите дробови, зошто не е направена и КТМ снимка на главата и се чекало 20 часови за тоа да се стори“, праша таткото на починатото девојче. Според Георгиевски, тоа било сторено еден час пред смртта на Марија, кога девојчето веќе било на апарати и не давало знаци на живот. „Планирам да ги тужам. Ми рекоа да поднесам барање со уплатница за историјата на болеста. Парите ми ги вратија, но историјата на болеста не ми ја дадоа“, рече таткото.Тој е уверен дека девојчето не било болно и како што вели дента си играло со своето братче.„Имам потврда од Брза помош дека детето беше свесно до носењето во болница. Детето поврати еднаш во Брзата помош од каде е однесено на Клиниката за инфективни болести“, нагласи Георгиевски. Исто така, таткото нагласи дека симптоматично е што потврдата која била испратена до Гробишта Бутел била пополнувана со три различни пенкала, а исто така биле впишани погрешни податоци за улицата и бројот. Покрај тоа, на спроводницата во капелата бил напишан и погрешен месец на раѓање, што го забележал кога со овие документи требало да ја одјави ќерката во МВР. Георгиевски потенцираше дека во прилогот кон умреницата не е напишано со што е третирано детето, туку само пишува со антибиотик. Тој информацијата дека Марија е почината од септичен шок ја дознал од телевизијата „Алфа“./крај/ми./сн