Транспарентност Македонија (ТМ) денеска го презентираше извештајот за декември во кој предупредуваат за корупција во седум случаи.

Разрешувањето на судиката Виолета Дума, според ТМ е неумесен и арогантен притисок врз независноста на судството од страна на министерот Михајло Маневски.

„Врховниот суд и Судскиот совет без ни малку срам и грижа на совест сега и отворено покажаа дека се само обична алатка на извршната власт и политиката. Прозвани од министерката за внатрешни работи и владејачката партија, тие влегоа во офанзива да го урнат она што остана од самостојноста и независноста на судството во Македонија“, рече Ана Јаневска – Делева од ТМ.

Што се однесува на последниот избор на судии направен во месец декември, од ТМ  констатираат дека ниту еден од новоизбраните судии не ги исполнува ни делумно критериумите предвидени со новиот Закон за судови, а кои ќе започнат да се применуваат во 2012 година.

„Доколку целта на предлагачот на Законот – Министерството за правда била подобрување на квалитетот на судиите, зошто тогаш овие критериуми се предвидува да важат од 2012 и зошто Судскиот совет не направи напор да бидат избрани судии кои барем делумно ги исполнуваат строгите критериуми утврдени за во иднина“, вели  Јаневска – Делева.

Според извештајот на ТМ делувањето на Државната комисија за спречување на корупција е недоследно и селективно.

„За ДКСК постојат привилегирани и недостапни функционери. Тоа особено се однесува на директорот на Управата за безбедност и контраразузнавање Сашо Мијалков, кој уште при именување на таа функција не се одважи да ја исполни својата законска обврска. Тоа го стори со големо задоцнување, а ДКСК не го санкционираше со прекршочна пријава и барање за испитување на неговата имотна состојба и покрај тоа што беше должна така да постапи“, образложи Јаневска – Делева .

ТМ ги повикува Управата за спречување на перење пари и финансирање тероризам, МВР и УЈП итно да го расветлат случајот „Медиа принт Македонија“, за како што велат да се спречат понатамошните шпекулации и политички манипулации. Тие го повикуваат јавното обвинителство да поведе истрага за неизвршување на должностите од страна на раководни лица во МВР и УЈП, бидејќи иако било реагирано за овој случај уште пред две години од ТМ тврдат дека тој не решен.

За случајот „Хонорари за Министерката за култура“ ТМ го повика премиерот Никола Груевски да ја разреши министерката Елизабета Канчевска-Милевска.

Во извештајот се наведени и измените на Законот за државна администрација, со кои според ТМ се отвораат дополнителни можности за партизација на државната администрација.

ТМ во извештајот укажува и на пресудата за пратеничката Весна Бендевска, и прашуваат кој ќе сноси одговорност и како ќе се надомести штетата врз неа доколку се докаже дека нејзините укажувања биле оправдани./крај/бд