Пензионираните армиски генерали се незадоволни од намалувањето на финансиите за војската, како и од намалувањето на воениот персонал во одбраната, вели генералот Илија Николовски, претседател на здружението на ветерани од одбраната и безбедноста. Своите забелешки членовите на ова здружение денеска му ги изнесоа на Претседател и Врховен командант на вооружените сили, Ѓорге Иванов на средба иницирана од нив. Иако сметаат дека одбрана е област каде што земјата најмногу постигнала во реформите, сепак велат дека тие не треба да се прават со намалување на финансиите и кадарот, туку со модернизација на опремата. „Јас лично и мои колеги не сме задоволни со структурата на силите. Мислиме дека бројната состојба на мирновремениот и воениот состав на армијата е недоволен и цениме дека во овој момент треба да има поголема бројна состојба од онаа што е планирана, затоа што Република Македонија сеуште не е во НАТО, таа е членка на Партнерството за мир, а тоа значи дека никој не одговара за безбедноста на Република Македонија. Во една таква ситуација цениме дека ова е недоволно и затоа треба повеќе средства да се издвојуваат и бројната состојба да биде поголема. Со други зборови, јас под реформи не подразбирам само скратување на бројната состојба, туку под реформи подразбираме и опремување на армијата со современа опрема. Ние од друга страна го скратуваме воениот дел, а од друга страна во Министерството за одбрана, во канцелариите нема место каде да влезете, цивилниот дел го зголемува“, вели пензионираниот генерал Николовски.Тој посочи дека иницирале средбите како денешната со претседателот Иванов редовно да се одржуваат. /крај/ач