Градоначалникот на општината Карпош Стевче Јакимовски е единствениот што го блокира проектот за изградба на армиски станови во касарната „Илинден“, обвини денеска  Конфедерацијата на слободните синдикати (КСС).Како што појасни на денешната прес конференција лидерот на КСС Раско Мишковски, дури и членовите на советничката група на СДСМ дале зелено светло за проектот.„Го повикуваме градоначалникот на Карпош, со сите расположливи механизми, во најкраток временски период да овозможи продолжување на реализацијата на исклучително значајниот проект за изградба на станови за припадниците на АРМ“, изјави Мишковски.Тој додаде дека овој проект е значаен за секој припадник на Армијата, но истовремено е значаен и за стопанството, стопанскиот развој, градежниот сектор и општините. „Станува збор за нешто што е позитивно за целата држава и затоа не треба истото да биде блокирано од било која страна“, вели Мишковски. Според него, претставниците на Самостојниот Синдикат на вработените во одбраната (ССВО) подолг период бараат прием, кај градоначалникот на општина Карпош, кој не само што ги прима, туку и ги навредувал.„Апелираме членовите на ССВО и останатите синдикати членки  на КСС, никој политички да не ги етикетира, затоа што овие луѓе во повеќе наврати покажале дека политиката нив не ги интересира“, рече Мишковски. Јакимовски неодамна изјави дека проблемот е во тоа што општината имала добиено податоци од катастарот за парцелите на сопствениците на земјиштето во касарната, но има парцели чии сопственици не биле идентификувани.„Тоа не се доволно податоци за нас за делот од парцелите, за да можеме да ја знаеме точната идентификација на земјиштето за да ги известиме сопствениците дека таму се работи урбанистички план. Тоа значи дека општината Карпош во наредниот временски период ќе пристапи кон изложување на свој трошок на изложување на овие 25 парцели за да се изложи земјиштето и за да се утврдат сопствениците, односно заинтересираните странки на тој дел од општината“, рече деновиве Јакимовски. /крај/ап/