Лидерите на најголемите политички партии и претседателот на државата Ѓорге Иванов на денешната средба во Јасен разговарале за спорот со името и притоа размениле мислења и споделиле информации за актуелностите поврзани со ова прашање.За позицијата на Македонија во спорот со името, Иванов истакна дека  таа е позната и секаде искажана, односно оти решението треба да се бара во рамките на ОН и усвоените резолуции. „Секое излегување од таа рамка, посегнување по нашиот идентитет, отворање на прашањето за името на нашиот јазик, на некој начин го попречува наоѓањето решение. Затоа ние секогаш на Нимиц му ги кажуваме нашите ставови дека мора да се држиме во рамките на резолуциите на ОН и тогаш е можно да се најде заемно прифатливо решение кое навистина ќе ги деблокира клучните процеси за нас“, изјави Иванов.За македонско-грчкиот спор Иванов најави дека ќе расправа и државниот врв.„За прашањето за името ќе расправа и државниот врв на средба на која амбасадорот Зоран Јолевски ќе информира за евентуално нови моменти во пресрет на средбата со посредникот Метју Нимиц и грчкиот преговарач Адамантиос Василакис на 9 февруари во Њујорк“, изјави Иванов.Премиерот Никола Груевски на средбата информирал за средбите со неговиот грчки колега Јоргос Папандреу. „Укажав на тоа дека другата страна се уште го оспорува македонскиот јазик и македонскиот идентитет и не се согласува тие да бидат признаени како такви во рамките на ОН и сите други институции. Се укажува дека доколку ние од тоа не се откажеме тие не би можеле да гласаат позитивно за почеток на преговорите на Република Македонија со ЕУ односно за членство во НАТО“, истакна Груевски.Според него таквиот грчки став е сериозен проблем и посочи дека сите политички партии имаат исто мислење по прашањето за идентитетот.Премиерот рече дека оваа година посакува зачестени разговори и прифатливо решение кое би можело да се стави на референдум, но оти нема никакви најави.„Сега немаме најава дали ќе има позачестени или поретки разговори. Во секој случај доколку и другата страна даде согласност на Нимиц, што веројатно нема да биде лесна работа, да имаме позачестени средби, ние тоа би го поздравиле“, изјави Груевски.На прашањето дали ќе има референдум за името, Груевски рече дека тоа зависи од доаѓањето до одредено решение.„За да има референдум треба да има некакво решение или барем некаков сериозен предлог кој би се ставил на референдум за да може граѓаните да се изјаснат. Во овој момент немаме предлог од господинот Нимиц којшто во најмала рака барем би бил прифатлив за Грција, а потоа да видиме и дали за нас е прифатлив за тоа да може да се стави на референдум. Услов за референдум е да имаме некаков сериозен предлог“, нагласи Груевски. Лидерот на СДСМ, Бранко Црвенковски, изјави дека тие ќе прифатат било какво решение што ќе го договори Владата, а кое нема да задира во националниот идентитет на државата.Лидерот на ДУИ Али Ахмети рече дека ги разгледале сите можни опции за спорот.Неговиот став е дека преговорите треба да се одвиваат во рамки на ОН преку медијаторот Метју Нимиц и оти САД треба поактивно и подиректно да се вклучат во решавањето на ова прашање.Лидерот на Нова демократија Имер Селмани, пак, смета дека решението за спорот за името со Грција не е на повидок.И според него потребно е вклучување на САД во процесот на изнаоѓање решение.На средбата во Јасен иницирана од претседателот Иванов, лидерите се согласиле дека спорот со името е главна пречка за интеграциите на Македонија во НАТО и ЕУ./крај/бд