Директорот на јавното претпријатие, „Македонски шуми“, Жарко Караџоски денешните наводи што ги изнесе Државната комисија за спречување на корупцијата ги нарече ноторни лаги

Во телефонски разговор за Макфакс тој ги отфрла податоците на ДКСК дека недомаќински трошел пари. „Ноторна лага е дека сум потрошил 11.500 евра за ручеци и вечери.. Јавното претпријатие „Македонски шуми“ потрошило многу повеќе пари,  со оглед на тоа дека има 30 подружници, 3.000 вработени, 30 директори. Она што се троши за такви намени изнесува еден отсто од вкупниот приход на ова јавно претпријатие.“ вели Жарко Караџоски. Во врска со службените патувања на релација Скопје – Прилеп, вели дека каде тој патува и како патува е регулирано со менаџерски договор. Вели дека е лага дека патува со приватно возило, а дека му се исплаќаат надоместоци. Како што тврди не користел сопствено возило за овие патувања. За набавката на артиклите за репрезентација, Караџоски вели дека тоа било јавно спроведена постапка на тендер и се било законски. „Дали ова претпријатие не треба вода да пие и не треба да имам со што да ги послужи гостите“ прашува Караџоски. Државната комисија за спречување на корупција покрена иницијатива за разрешување на директорот на „Македонски шуми“, Жарко Караџоски. Според документацијата со која располага ДКСК, јавното претпријатие потрошило околу 11.500 евра за ручеци и вечери. За артикли за репрезентација, само во 2010 г. биле потрошени околу 6.500 евра. Покрај вообичаените артикли за репрезентација биле набавени и скапи алкохолни пијалоци, најчесто виски. Караџоски заедно со неговиот возач, Љупчо Здравески примале пари како да патувале со службено возило на релација Скопје- Прилеп, иако патувале со приватно возило. За ова им биле исплатени околу 850 евра.