Либералдемократите денеска го повикаа претседателот на Собранието, Трајко Вељаноски да ги создаде сите можни услови за да се вратат опозициските партии во Собранието, во споротивно тие сметаат дека единствен институционален излез се предвремени избори.

„Го повикуваме Вељаноски да направи се што може за да ги повика назад политичките партии. Се согласувам дека главниот проблем е кај Владата и тој треба да се конслутира со својот партиски шеф, бидејќи така функционира. Во спротивно ЛДП смета дека единствен институционален излез од политичката криза е распишување на предвремени парламентарни избори“, изјави пратеникот Андреј Жерновски од ЛДП.

ЛДП остануваат во Собранието зашто, како што рече Жерновски, решението ќе го бараат во институциите на ситемот.

Според него најголемите манипулации се прават кога се бојкотира работата на законодавниот дом.

„ЛДП има солидно искуство во бојкотирање, преку тоа искуство можам да кажам дека најголемите манипулации се случиле во тој период. ЛДП ги бојкотираше изборите во 2004 година, тогаш владата на Бранко Црвенковски сама раководеше четири години со Собранието и се случија низа злоупотреби. Да потсетам тогаш беше и онаа фамозна приватизација. Бојкотиравме и во 2008 година кога ВМРО – ДПМНЕ донесе над 150 закони во Собранието меѓу кои и Деловникот за работата на Собранието и затоа ние повикуваме да се вратат политичките партии, но се разбира Владата да созаде соодветни услови“, истакна Жерновски.

Претседателот Вељаноски за денеска имаше закажано координациска средба на која требаше да се разговара за актуелните собраниски случувања, но координаторите на пратеничките групи од опозицијата не се појавија. Тој нејзино продолжение закажа за попладнево./крај/бд