Агенцијата за катастар на недвижности воведе две нови Интернет-услуги во делот на своето работење. Услугите „Увид во статусот на поднесено барање“ и „Пристап до податоци од катастарот на земјиште“ имаат за цел скратување на времето и трошоците на граѓаните и фирмите при обезбедувањето на потребните податоци од Катастарот.Услугата „Увид во статусот на поднесено барање“, достапна преку веб-страната на Агенцијата за катастар на недвижности, е наменета за странките кои ќе поднесат барања и кои по електронски пат ќе можат да го проверат статусот на поднесеното барање: дали е решено, одбиено или е во фаза на решавање. Оваа услуга е бесплатна.Втората услуга, која денес беше презентирана, е наменета за приватните геодетски фирми. Услугата „Пристап до податоци од катастарот на земјиште“ ќе послужи за изготвување на геодетски елаборати за излагање на оние недвижности кои останале со незапишани права во постапката на систематското излагање. За оваа услуга корисниците прво треба да направат договор со Агенцијата за користење на услугата.„Оваа услуга потекнува од идејата која се појави на барање на Комората на овластени геодети бидејќи податоците се неопходни за изработка на геодетските елаборати. Услугата во голема мера ќе ја олесни работата на трговските друштва за геодетски работи, ќе се намали притисокот врз Агенцијата и, секако, брзината на изготвување на елаборатите на општ интерес ќе биде зголемена“ – изјави Борис Тунџе, претседател на Комората на овластени геодети.На денешната презентација беше најавена и промоцијата на други услуги од областа на електронското работење на Агенцијата за катастар на недвижности, како Вебгис-порталот со 2Д и 3Д геопросторни податоци и Електронски шалтер, со кој професионалните корисници ќе можат да користат податоци од геодетско-катастарскиот информационен систем.„Електронскиот катастар е присутен во Скопје, Кавадарци и Неготино. Нашата обврска и желба на Агенцијата е со електронски систем да бидат покриени сите поголеми градови во целата држава. На тој начин генерално се обидуваме да го реформираме катастарот со цел да биде една од најдобрите институции во државата“ – нагласи Љупчо Георгиевски, директор на Агенцијата за катастар на недвижности на Република Македонија.На денешната презентација на новите услуги на Агенцијата за катастар на недвижности присуствуваа и Африм Усеини, заменик-директор на Агенцијата за катастар на недвижности на Република Македонија, и Славче Трпески, помошник на директорот за Центар за катастар на недвижности Скопје.Новите услуги практично ги презентираше Гоце Груевски, раководител на ИТ-секторот во Агенцијата.Услугите се достапни на веб-страницата www.katastar.gov.mk на Агенцијата за катастар на недвижности./крај/т.д.