Македонија
Бучковски го оправда патувањето, судиката се налути
„Пратеникот Владо Бучковски е на службено патување и Собранието знае за тоа”, тврдеше неговиот адвокат Никола Поленак на денешното продолжение од судскиот процес за случајот „Резервни делови“. Бучковски е првообвинет, а бидејки не се појави на претходното рочиште, иако имаше доставено докази каде е, судот нареди негово стражарно приведување. Денес судијата Дијана Груевска-Илиевска кажа дека полицијата не постапила по наредбата на судот и не дала образложение зошто. Наредбата беше издадена по преписката на судот и Собранието од која се гледа дека Собранието дало информација дека Бучковски не е на службено патување. Денес неговиот адвокат со куп документи од Собрание докажуваше дека Бучковски е на службен пат во Израел. За организирањето на патувањето знаел пратеникот Павле Трајанов, кој писмено го известил претседателот на Собранието Трајко Вељановски. На документацијата за патувањето се потпишани и претставничките на СДСМ и ВМРО -ДПМНЕ , Цветанка Иванова и Силвана Бонева. „Бучковски многу се вознемири оти некои медиуми соопштиле дека лаже за патувањето, па затоа испрати и фотографии со Лиле Поповска од Израел”, рече адвокатот и ги понуди ако треба судот да ги види фотографиите. Судијата рече дека сепак повторно ќе мора да ги провери наводите на адвокатот и презентираните документи, по што настана кавга. Адвокатот ја прекори како може да не верува на собраниски документи, а таа отворено проговори и ги обвини присутните дека прават сè за да и ја одолговлекуваат постапката. “Како тоа ноќта пред судење обвинетите се разболуваат, а следниот ден на пладне по судењето се здрави. Од сега јас лично ќе ги проверувам сите лекарски известија што пристигнуваат во судот”, рече налутено судијата Груевска-Илиевска. Во Основниот суд 1 во Скопје се води повторен судски процес за случајот “Резервни тенковски делови”. Пред две години беше донесена осудителна пресуда со која екс министерот Бучковски беше осуден на 3 и пол години затвор за набавка на прекумерна количина резервни делови за тенкови. И поранешниот началник Методиј Стамболиски доби истата казна. Двајцата логистичари во одбраната Ацо Ѓурчевски и Нелко Менкиновски, но и директорот на МЗТ ФОП Митре Петковски, беа осудени на тригодишни казни затвор. Осудените без задолжени и солидарно во буџетот да вратат 2,4 милиони евра. Апелациониот суд ја укина пресудата и го врати предметот на повторно судење но не во одделот за организиран криминал туку во обичен. /крај/км
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сиљановска Давкова на Самитот на иднината во Њујорк
Претседателката Гордана Сиљановска Давкова, која ја предводи македонската делегација на 79. Генерално собрание на ОН, денеска треба да се обрати на Самитот на иднината на тема „Мултилатерални решенија за подобро утре“ со учество на шефови на држави и влади.
Целта на Самитот на иднината е државите членки да ја зголемат меѓусебната соработка која, како што се нагласува, е се поважна за човековиот опстанок, но е тешко да се постигне во атмосфера на недоверба, користејќи застарени структури кои повеќе не ги одразуваат денешните политички и економски реалности.
Во фокусот на Нацрт-пактот се човековите права, родот и одржливиот развој во сите поглавја. Содржи поглавја за одржлив развој и финансирање за развој, меѓународен мир и безбедност, наука, технологија и иновации и дигитална соработка, младите и идните генерации и трансформирање на глобалното владеење. Меѓудругото, се бара земјите членки да се согласат и за реформи што се однесуваат на Советот за безбедност, но тоа најверојатно нема да се случи.
На Самитот треба да бидат усвоени и Декларација за идните генерации и Глобален Дигитален договор.
Македонија
ВМРО-ДПМНЕ му порача на СДСМ дека платите растат и можат само да учат како се работи
„Со СДС Македонија ја престигнаа Албанија и БИХ во раст на БДП по глава на жител, а сега се работи забрзано на економска трансформација, а сега СДС манипулира бидејќи со нив заостанавме зад сите во регионот, а реалната плата имаше пад, а не раст“, одговорија од ВМРО-ДПМНЕ како реакција на прес-конференцијата на Јована Тренчевска од СДСМ.
„Додека Македонија имаше раст на БДП по глава на жител во период од 2017 до 2022 од само 20%, во Србија растот е 50%. А за истиот период во Бугарија по глава на жител БДП се зголемил за 64%. Повеќе од двојно поголем раст од Македонија има и Албанија, каде по глава на жител во периодот од 2017 до 2022 година БДП пораснал за 52%. Во 2017 Македонија има поголем БДП по глава на жител и од Албанија и од БИХ, сега и двете земји кои беа зад нас не поминаа, а Србија, Бугарија и Црна Гора се уште повеќе пред нас. Со СДС Македонија има ненадоместливи штети. Со ВМРО-ДПМНЕ Македонија оди кон економска трансформација, нови инвестиции, владеење на правото и нови мерки и проекти за подобра иднина. За првпат во историјата на државата пензиите ќе се зголемат за 5000 денари. Ќе растат и платите. Македонија оди напред, а СДС можат само да учат како се работи“, се вели во реакцијата на ВМРО-ДПМНЕ.
Македонија
Дојде ВМРО-ДПМНЕ и Мицкоски и платите почнаа да паѓаат, обвинува Тренчевска
Економските политики на Христијан Мицкоски и владата на ВМРО-ДПМНЕ потфрлија и за прв пат, после седум години постојан раст, сведоци сме на пад на просечната плата кај нас – намалена е за 1.000 денари, рече на прес-конференција Јована Тренчевска од СДСМ.
Според официјалните податоци на Државниот завод за статистика, просечната месечна плата по вработен, во јули годинава изнесувала 40.961 денар. или за 1.000 денари помалку од платата во месец јуни кога изнесуваше 41.939 денари.
„Ова не е само статистика. Ова намалување на просечната плата ги одразува погрешните политики на Мицкоски и ВМРО-ДПМНЕ од една страна и претставува удар врз стандардот на граѓаните од друга страна. Пад од 1.000 денари значи помалку пари во џебот на народот, помалку пари за храна на трпезите, помалку можности, намален квалитет на живот, понизок стандард. Политиките на владата потфрлија во клучната сфера, платите на луѓето, токму онаму каде граѓаните најмногу очекуваа и каде најмногу им е потребно. Наместо да поттикнуваат раст и зголемување на платите ВМРО-ДПММНЕ ја враќа политиката од минатото владеење каде работниците беа евтина работна сила. Ова намалување на просечната плата е јасен показател дека нивното економско управување не е само несоодветно – тоа е и штетно. СДСМ во изминатите години ја зголемуваше просечната плата во континуитет и во време на кризи и достигна над 41.000 денари. Во времето на ДПМНЕ, во 2015 година, просечната плата изнесуваше само 20.853 денари. Платата постојано растеше со СДСМ со години наназад, во 2020 година просечната плата беше 28.294 денари, во 2022 година беше 34.364 денари а во 2024 година достигна над 41.000 денари. Дојде ВМРО-ДПМНЕ и Мицкоски и платите почнаа да паѓаат. Неприфатливо е која било влада да дозволи тоа да се случи, особено кога семејствата се борат со секојдневните поскапувања. Бараме владата на Христијан Мицкоски да ја промени оваа погрешна политика и да ги зголеми платите. СДСМ ќе продолжи да се бори за поголеми плати, правични плати и подобри услови за живот за сите наши граѓани“, додаде Тренчевска.