Надворешното оценување на професорите како дел од предлогот за измени на законот за високо образование, повторно е во игра, иако министерот за образование и наука Никола Тодоров најави негово повлекување.

На денешната седница на собраниската Комисија за образование и наука, министерот рече дека е против овој амандман, но членовите во Комисијата од редовите на ДУИ повторно го предложија.

Министерот гласаше против, но сепак амандманот беше изгласан.

Доколку надворешното оценување, или екстерната евалуација на професорите биде изгласана и во Собранието, тоа би значело дека трето надворешно лице ќе ги надгледува универзитетските професори додека тие работат, предлог кој од нив беше оценет како најнавредлив.

Предлогот за измена на законот за високо образование помина на Комисијата и сега оди на пленарна седница на Собранието.

Предложените измени на законот за високо образование беа прифатени од Владата и тие влегоа во законска процедура. Професорите повторно беа изненадени од ваквата постапка на министерот, особено откако тој на нивниот протест ја прифати отворената покана од универзитетските професори да дојде оваа недела на закажаната седница на Сенатот и пред нив да го одбрани својот предлог. По усвојувањето на измените од страна на Владата, за предлогот треба да расправа и одлучува и Собранието.

Голем дел од академската заедница влезе во отворен конфликт со министерот за образование и наука, Никола Тодоров, поради неговиот предлог за измени во законот за високо образование, кои вклучуваат построги критериуми за станување доцент, асистент и професор, објавување на повисок број научни трудови, отчет на јавните универзитети пред Собранието и јавноста, самоевалуација на професорите итн. Дел од професорите измените ги сфатија како упад во автономијата на универзитетите. /крај/ко