На улица Македонија денеска беше поставен  првиот дисплеј за мерење на амбиентниот воздух во градот на кој граѓаните ќе се информираат за квалитетот на воздухот во Скопје.Дисплејот е автоматски портабл кој што врши мерење на загадувачките материи во воздухот: јаглеродмоноксид, сулфурдиоксид, азотни оксиди и партикуларни честички помали од 10 микрометри, како и на метеоролошките параметри, температура на воздухот, брзина и правец на ветерот и влажноста на воздухот„Одлучено е да се постави овде пред се заради тоа што е пристапно за голем број граѓани што можат да го видат заради презентирање на податоците. Поставувањето на инструментот на некоја сообраќајница би претставувало само индикативно мерење и состојба на самата сообраќајница. Тоа не претставува квалитет на амбиентниот воздух во градот. Квалитетот на воздухот се мери подалеку од сообраќајница. Овде загадувањето доаѓа од двете сообраќајници од двете стани на улица Македонија, така да овој инструмент ги собира сите загадувачки материи кои се разнесуваат во воздухот, а тоа е она што го дишеме“ – рече Лилјана Манчевска од  секторот за животна средина во градската управа.Сите овие податоци ќе бидат прикажани и текстуално и во боја, а ќе можат да се прочитаат и на веб страницата на Град Скопје.„Планираме вакви мерни инструменти да поставиме во сите општини Чаир или Бутел во Карпош, Ѓорче Петров и Гази Баба и со оваа мрежа би имале целосна слика за амбиентниот воздух во градот. Ќе имаме можност да видиме каква е состојбата со воздухот во цело Скопје и за тоа кои мерки ќе треба да ги преземеме за да може да го подобриме амбиентниот воздух во градот“ – рече градоначалникот Коце Трајановски на денешната презентација.Инструментот ќе го покажува и загадувањето во секој период од денот. Инструментот е набавен по пат на јавна набавка од фирмата Фармахем и чини околу пет милиони денари.На новинарско прашање дали градоначалникот се чувствува непријатно што ќе вози скап службен автомобилите, Трајановски рече дека не се работи за полуксузен автомобил од тие што градот веќе ги има.„Градот моментално има два мерцедеса С класа кои се набавени пред 15 години. Тие два мерцедеси се со подобра опрема од мерцедесот кој што беше на јавна набавка. Неговата вистинска вредност не е 80 000 евра, туку 105 000 евра, тоа е попуст од 25 до 30 отсто. Иста класа е со постојните со тоа што има помалку опрема, а седиштата се од текстил“ – рече Трајановски. крај/к.с