Хрватска ќе продолжи силно да ја поддржува Северна Македонија, која заслужува членство во ЕУ, му рекол хрватскиот премиер Андреј Пленковиќ на својот македонски колега, Христијан Мицкоски.

Двајцата разговарале телефонски, а станало збор за понатамошната динамика на европскиот пат на Северна Македонија, како и за претстојниот Извештај за напредокот и ситуацијата во Југоисточна Европа, информираше Пленковиќ на социјалните мрежи по разговорот со Мицкоски.

S premijerom @MickoskiHM 📞 razgovarao sam o daljnjoj dinamici europskog puta Sjeverne Makedonije, predstojećem Izvješću @Europarl_EN o napretku i stanju na jugoistoku Europe. Hrvatska će nastaviti snažno podupirati Sjevernu Makedoniju, koja zaslužuje članstvo u EU-u! 🇭🇷🤝🇲🇰 pic.twitter.com/2PlzAd5fOu

— Andrej Plenković (@AndrejPlenkovic) June 21, 2025

Македонскиот премиер соопшти дека телефонскиот разговор бил во пресрет на извештајот на Европскиот парламент.

„Продолжувам да ги користам сите контакти за да ја раскажам македонската вистина – за нашиот напредок, за вредностите што ги браниме и за иднината што ја заслужуваме. Хрватска е докажан пријател на нашата држава, а нејзината гласна поддршка во клучни моменти претставува голем поттик и охрабрување за сите нас. Македонија заслужува членство во Европската Унија, но со крената глава“, напиша Мицкоски на Икс.

Имав телефонски разговор со премиерот на Република Хрватска, @AndrejPlenkovic. Во пресрет на извештајот на Европскиот парламент, продолжувам да ги користам сите контакти за да ја раскажам македонската вистина – за нашиот напредок, за вредностите што ги браниме и за иднината што… pic.twitter.com/W7I6jqx9H5

— Христијан Мицкоски (@MickoskiHM) June 21, 2025

Обвинувања за раководството во РЕК Битола упати Методија Илиевски од СДСМ во изјава за медиумите и го повика Обвинителството да отвори постапка.

Тој рече дека она што се случува во РЕК Битола не е никаква саботажа, туку корупција од епски размер и местење на тендери за неспособни партиски фирми.

„Суштината на скандалот е следна, новото раководство на РЕК Битола, поставено од Владата на ВМРО-ДПМНЕ и лично блиско до премиерот Мицкоски, потпишало рамковна спогодба вредна 150 милиони денари за чистење со фантомска фирма без ниту еден вработен. Компанија без техничка опрема, без кадар и без искуство. И како шлаг на тортата – управителот, неофицијално, е молер со кривична историја во Германија. И како што секогаш бива, се случува хаварија во РЕК Битола, пожар. Блоковите испаѓаат од мрежата а ЕСМ веднаш излегува со термин – „саботажа“, изјави Илиевски.

Вели дека вистинската саботажа е од страна на директорите кои наместо да ангажираат сериозна фирма која може да ги испорача услугите за кои склучила договор од 2,5 милиони евра, тие ги тераат работниците сами да чистат. Чистат без соодветна опрема, без опис на работно место, без дополнителен надомест.

СДСМ тврди дека РЕК распишал оглас со брутално прецизни и тешки услови за понудивачите. Побарале минимум 330 ангажирани работници, тешка механизација, логистика за 24/7 за интервенции. Сето тоа на хартија. Во реалноста – добиле компанија која не може да ги исполни ни 1 отсто од тие услови, односно наместо да ги има вработените и опремата, фирмата склучува договор дека ако го добие тендерот, ќе ги обезбеди.

СДСМ го праша премиерот Христијан Мицкоски, кој ќе одговара? Дополнително партијата прашува кој ја потпишал оваа рамковна спогодба, кој дозволил оваа фирма воопшто да влезе во процедура, зошто јавноста е лажена и зошто документите се кријат, дали ЕСМ ќе ја активира банкарската гаранција за неспроведените обврски.

Партијата ги повика Јавното обвинителство, Државната комисија за спречување на корупција, Државниот завод за ревизија – веднаш да отворат постапка.

И владејачката ВМРО-ДПМНЕ го повика Обвинителството да го провери случајот со сертификатот на Христовски, а доколку испадне дека нема вистина, СДСМ јавно да се извини.

Реакцијата следи по прес-конференцијата на Социјалдемократите на која беше побарано од ОЈО повторно да го истражи случајот со сертификатот за англиски јазик на директорот на АНБ, Бојан Христовски.

ВМРО-ДПМНЕ  повтори дека судиите и обвинителите се сè уште истите што ги избрал СДСМ, а доколку имаат нешто противзаконски за Христовски први ќе го повикаат за разговор.

Владејачката партија вели дека завршено е времето на „овој ми е брат“ или „од партија е не го чепкај“, па сега секој еден без разлика на партиска, верска или етничка припадност, ќе си одговара за одредена работа доколку постојат докази.