Полициски патроли и натаму ја обезбедуваат околината на скопско Кале, по инцидентот, во кој според досегашните информации биле повредени осум лица, од кои двајца полицајци.Ова се наведува во официјалното соопштение што Министерството за внатрешни работи го издаде попладнево во врска инцидентот на скопско Кале, во кој се судрија две спротиставени групи, од македонска и албанска националност.„На повреди од каменувањето досега се пожалиле двајца полициски службеници, а од градската општа болница е добиено известување дека кај нив е укажана помош на уште шест лица на возраст од 13 до 24 години кои се пожалиле на повреди“, стои во соопштението. Од МВР информираат дека полициски патроли сеуште ја обезбедуваат околината, а наредните денови врз основа на снимените материјали ќе бидат повикувани учесниците во инцидентот.Според МВР, инцидентот се случил околу 13,15 часот на тврдината Кале во Скопје,  кога стотина лица од две групи започнале меѓусебно да се каменуваат. „До инцидентот дошло во моментот кога на тврдината се пресретнале двете групи кои протестирале за и против изградбата на објектот“, се вели во соопштението.Полициските службеници кои биле присутни на местото се поставиле помеѓу двете групи и за 15-тина минути успеале да ги раздвојат и да ја смират ситуацијата, се додава во соопштението на МВР. /крај/со/ап/