Приведени за инцидентот на Кале се уште нема, ниту одговорност за заменик министерот за внатрешни работи, Џевад Бучи, кој им даваше наредба на полициските службеници да ослободат дел од приведените на Калето.

На прашањето според кои закони Бучи ги ослободуваше лицата и дали ќе понесе одговорност за ова, Јанкулоска вели дека нејзината надлежност е да го оценува делувањето на полициските службеници, додека однесувањето на политичките функционери го ценеле органите кои ги именувале.

„Од она што ни беше презентирано од колегите практично се работи за тактичка одлука каде што на лицата им е утврден идентитетот што значи тие и се потребни на полицијата и нивно дополнително задржување не би значело прогрес на истрагата, така што и сега во овој момент ние знаеме точно за кои лица се работи, го имаме нивниот идентитет и зависно од консултациите со обвинителството ќе одлучиме како да постапиме во овој конкретен случај“, рече Јанкулоска.

Како што објасни Јанкулоска, полициските службеници дејствуваат по наредба на нивните непосредни старешини и претпоставени во редот на хиерархијата. Со конкретната операција управувал старешинскиот кадар од секторот за внатрешни работи Скопје.

Јанкулоска денеска се сретна со своите колеги од СВР Скопје за да ја информираат за последните настани кои се случуваа на Калето. Јанкулоска е задоволна од дејствувањето на полицијата и според неа, нејзиното дејствување резултирало со минимална материјална и друга штета.

Врз нејзината проценка влијае и тоа што протестите не биле најавени, специфичноста на теренот и бројноста на оние кои дошле на Калето.

„Полицијата се обиде да спречи поголема ескалација на настаните, и согласно целокупната констелација немаше пропусти во дејствувањето на полицијата“ рече Јанкулоска./крај/фф