Комисијата за заштита од дискриминација, која требаше да започне со работа на 01.01.2011 година, сè уште јавно нема објавено каде и кога започнува со работа, реагираат од Хелсиншкиот комитет за човекови права.

Врз основа на информации добиени од Министерството за труд и социјална политика, претставници на Хелсиншкиот комитет на 27. јануари 2011. година беа упатени во зградата на Македонската Радио Телевизија, но за жал и покрај упорната потрага од таму добивме одговор дека Комисијата за заштита од дискриминација не е сместена таму, ниту имаат информација дека треба да биде таму сместена, се вели во извештајот на Комитетот за состојбата со човековите права во земјата.

Хелсиншки ја потенцира изјавата на Душко Миновски, актуелниот претседател на Комисијата, кој изјави дека до сега до неа пристигнале неколку претставки, но се очекува тој број нагло да се зголемува.

„Останува отворено прашањето на кој начин странките кои наводно поднеле претставки до сега, ја пронашле Комисијата и што е со сите оние кои сакаат во моментов да поднесат претставки. Да потсетиме само дека Законот предвидува рок од три месеци од настанатата повреда за пријавување на истата до Комисијата. Рок кој тешко може да се испочитува ако жртвата не е информиран каде да ја поднесе пријавата“, велат од Хелсиншки и запрашуваат дали ваквите потези се „прв чекор во бојкотирање на законот или суптилен обид да се избрише постоењето на ваквата Комисија од колективната меморија“./крај/со/ко