NULL

Денес адвокатите на Владо Бучковски и останатите обвинети за случајот тенковски делови во Судскиот совет поднесоа барање за поведување постапка за утврдување нестручно и несовесно вршење на судиската функција на судијата Дијана Груевска Илиевска заради суштествени повреди на постапката. За овој случај на нестручно и несовесно вршење на судиската функција, писмено е информиран и Претседателот на Врховниот суд, Јово Вангеловски. Барањето е поради последните настани кои наместо до судење, доведоа до кавги во судница. Поради отсуство на Бучковски заради службено патување, судиката нареди негово стражарно приведување. Потоа откако пратеникот Бучковски го оправда патувањето и судењето требаше да започне, еден од обвинетите не се појави во судница оти бил хоспитализиран. Но судиката иако отсуствуваше обвинет се обиде да го започне судскиот процес. Тогаш жестоко реагираа адвокатите дека судиката ги крши законите. Побараа изземање од процесот за што одлука треба да донесе Претседателот на судот. Од друга страна судиката, пак, на секое судење појаснуваше дека судскиот процес не може да го сработи бидејки 13 пати го одлагала. Причини за одложувањето беа влошена здравствена состојба на дел од обвинетите. Таа добиваше лекарски потврди дека вечерта пред судењето на обвинетите им се слошило, за следниот ден биле пуштани на домашно лекување. Судијата Дијана Груевска Илиевска на последното рочиште кажа дека лекарските потврди биле од амбулантски извештаи.   Бучковски и останатите обвинети одговараат за финансиски малверзации при набавка на резервни делови за тенкови од времето кога пратеникот беше министер за одбрана. Ова е повторена постапка Бучковски  еднаш беше осуден на три и пол години затвор, но пресудата ја укина Апелациониот суд. Предметот го работеше одделот за организиран криминал, а сега се суди во обичен. /крај/км