„Транспарентност Интернешнл Македонија“ ќе побара да се укине член од Законот за кривична постапка кој се однесува на привремено обезбедување и одземање на предмет или имот, бидејќи смета дека со неговата примена се нарушува уставниот поредок на Македонија

Поттикната од правните мерки што беа преземени во случајот „Пајажина“, Транспарентност ќе поднесе иницијатива до Уставен суд за оценување на уставноста и законитоста на став 1, член 203-а од Законот за кривична постапка, со кој се регулира начинот на враќање на привремено одземените предмети во кривична постапка. „Се прави некаква комбинација, помеѓу различни одредби од законот за кривичната постапка, едни одредби се цитираат во насловот на решението, а други одредби во текстот  и содржината на решението со кои се образложува мерката, без да се оправда целта“, рече Слаѓана Тасева, од ТИМ.„Транспарентност“ констатира дека со примената на овој член „сите институции придонеле кон сериозна повреда на уставните принципи и загрозување на уставно гарантираните права“. Сметаат дека примената на член 203-а во практиката доведува „до правна несигурност, произволност и процедурална и правна нетранспарентност“. Организацијата најави дека ќе остави судот да одлучи дали одредбата е во склад со Уставот и законите или истата треба да биде укината или поништена. Членот 203 од Законот за кривична постапка гласи: „Предметите што во текот на кривичната постапка се привремено одземени ќе му се вратат на сопственикот, односно држателот ако се запре постапката, а не постојат причини за нивно одземање“.