Македонскиот застапник, Пјер Клајн, денеска во Хаг побара да се отфрлат тврдењата на Грција дека Меѓународниот суд на правдата не е надлежен за поднесената тужба од страна на земјава во врска со прекршувањето на времената спогодба

Според Пјер Клајн, спорот со името е одвоен од поднесената тужба и поради тоа ги отфрли тврдењата на Грција, според кои, со постапувањето по спорот, судот би се впуштил во одлучување по политичко прашање. „Овде сме да покажеме дека барањата се конкретни и вистински, како во однос на НАТО, така и во однос на другите организации во коишто подносителот (Македонија) би сакал да се зачлени, како што е на пример, Европската Унија. Тоа не доведува до тврдењето за мешање во политички процеси, односно во преговорите за името на подносителот (Македонија), што според тужената страна (Грција) би довело до откажување на судот од овој случај. Би сакале да потсетиме дека подносителот јасно ја покажа својата воздржаност во однос на ова, додека другата страна јасно одбра да ги занемари целосно фактите поради тоа што не е во нивна корист и нивните адвокати не рекоа ништо минатата недела“, рече Клајн, професор по меѓународно право од Брисел.Излагањето на Клајн е во рамки на втората фаза од усната расправа по тужбата на Македонија против Грција пред судот. Целта на тужбеното барање е судот да утврди дека Грција на самитот на НАТО во Букурешт во 2008-ма година го прекршила членот 11 од привремената спогодба од 1995 година, односно дека приговорила на членството на земјата во Алијансата под привремената референца „Поранешна Југословенска Република Македонија“. Од судот, исто така, се бара на Грција да и наложи понатаму да не ја прекршува спогодбата.