Спикерот на Собранието, Трајко Вељаноски, на конференцијата на претседатели на парламенти од ЕУ што се одржува во Брисел, во понеделникот зборуваше за слободата на медиумите и состојбата во оваа сфера во република Македонија, две децении по воведувањето на демократијата.

Спикерот на Собранието, Трајко Вељаноски, на конференцијата на претседатели на парламенти од ЕУ што се одржува во Брисел, во понеделникот зборуваше за слободата на медиумите и состојбата во оваа сфера во република Македонија, две децении по воведувањето на демократијата.Претседателот на Собранието на Република Македонија, Трајко Вељаноски престојува во дводневна посета на Брисел каде учествува на Конференција на претседатели на парламентите од Европската унија, по покана од претседателите на Претставничкиот дом на Парламентот на Белгија, Андре Флаут и на Сенатот на Белгија, Дени Питерс. Тој денеска се обрати на првиот дел на конференцијата кој е фокусиран на парламентарната контрола врз заедничките надворешни и безбедносни политики и заедничките безбедносни и одбранбени политики, како и на односот на парламентот, мислењето на јавноста и медиумите, но и на улогата на парламентите во контролата на европската сфера на слобода, безбедност и правда со посебен осврт на парламентарната контрола врз службите за разузнавање и мониторингот на Еуропол.„Денес, по две декади од освојувањето на демократијата, доколку погледнеме наназад, со гордост може да си спомнеме на исчекорите кои беа направени. Слободата беше освоена, а тоталитаризмот поразен. Семето на демократијата беше посеано на македонската почва. Меѓутоа, почитувани пријатели, природата на демократската власт, во својата основа го има перманентното чекорење кон хоризонтот на слободата, чиј главен столб се граѓаните. Во тоа светло, дополнителна алатка што ни ја донесе новото време, бездруго е, развојот на информатичката технологија и интернетот. Оттаму, основната дилема е каков одговор треба да вообличи современата демократска држава, во оваа ера на забрзан технолошки развој во која информацијата е лесно достапна, бесплатна, а изворите на информирање се потполно децентрализирани. Секогаш одговорот на вечната битка за слобода е сведувањето на слободата на медиумите, сама на себе, без никакви ограничувања“, рече Вељаноски.Како што истакна спикерот на македонскиот парламент, овие околности се основата што овозможува уште повеќе да се отворат вратите на Собранието за македонските граѓани, преку слободниот печат што го илустрираше со цитат од францускиот книжевник и филозоф Алберт Ками – „тој може да биде добар или лош, но сосема е сигурно дека без слободата на информирањето, сé ќе биде лошо во државите“.„Македонскиот законодавен дом се обидува во најголема можна мера да се приближи до хоризонтот на слободата на информирањето, имајќи ги постојано во вид трендовите на развојот на информатичката технологија. Во конкретна смисла, во рамките на јавниот телевизиски сервис, чиј основач е Собранието на Република Македонија, функционира посебен парламентарен канал, кој е нашата главна комуникациска порта со граѓаните. Преку неа се врши директен пренос на сите пленарни седници и пренос на седниците на работните тела, како и јавни расправи, но и надзорни расправи преку кои практично се реализира надзорната функција на парламентот врз извршната власт. Во оваа смисла, следејќи ги компаративните искуства на државите-членки на Европската унија, во догледен период содржините на парламентарниот канал ќе ги збогатиме со воведување на специјализирани емисии посветени на парламентарното работење, секојдневни парламентарни вести, дебатни емисии, посебни тематски емисии, и слични информативни содржини“, рече Вељаноски.Вељаноски, како што рече во своето обраќање, смета дека втора значајна алатка на медиумска стратегија бездруго е интернетот.„Имајќи го предвид фактот дека повеќе од 70 отсто од македонските граѓани секојдневно редовно пристапуваат на интернет, Собранието на Република Македонија ја унапреди својата интернет страница, која во моментов ги обединува улогите и на телевизијата и на печатот, а воедно претставува и местото каде може да се пронајде сé што е важно, а се однесува на македонската законодавна власт од стекнувањето на независноста до денес“, рече Вељаноски посочувајќи дека граѓаните можат да ги видат сите материјали што влегуваат во собраниска процедура, може да се следи канал за видео пренос на пленарните седници во живо а во видео архивата од скоро ќе може да се погледнат и видео записи на сите пленарни седници, од осамостојувањето на Македонија до денес.Како што соопшти прес-службата на Собранието, на конференцијата во Брисел на којашто учествуваат 44 спикери на горни и долни домови на парламенти на европските држави, ќе се дебатира за парламентарната контрола врз заедничките надворешни и безбедносни политики и заедничките безбедносни и одбранбени политики, за односот на парламентот, мислењето на јавноста и медиумите, како и за улогата на парламентите во контролата на европската сфера на слобода, безбедност и правда со посебен осврт на парламентарната контрола врз службите за разузнавање и мониторингот на Еуропол.Според најавите, вториот дел од Конференцијата ќе биде посветен на последиците од светската економска криза и на начините за справување со нив. /крај/со./сн