Партиските лидери денеска го потпишаа Кодексот на однесување за слободни и фер избори, но речиси сите опозициони лидери стравуваат дека ова потпишување ќе остане само на хартија со оглед на тоа дека уште пред да почне изборната кампања, гласачите се изложени на притисок и злоупотреба.

Партиските лидери денеска го потпишаа Кодексот на однесување за слободни и фер избори, но речиси сите опозициони лидери стравуваат дека ова потпишување ќе остане само на хартија со оглед на тоа дека уште пред да почне изборната кампања, гласачите се изложени на притисок и злоупотреба.

Сите ветија дека партијата од која доаѓаат ќе се однесува согласно напишаното во Кодексот, но изразија сомнеж за однесувањето на другите политички партии.

Претседателот на ВМРО – ДПМНЕ и премиер, Никола Груевски и лидерите на ДУИ и ДПА, Али Ахмети и Мендух Тачи по потпишувањето на Кодексот не дадоа изјава за медиумите. Лидерот на најголемата опозициска партија, Бранко Црвенкоски потпишувањето на ваквиот Кодекс од страна на Груевски го оцени како врв на лицемерието.

„Сведоци бевме на еден скандал којшто беше поткрепен со аргументи за груба злоупотреба на вработените во државната администрација кои се користат со закани, заплашувања, притисоци се со цел да се натераат луѓето да гласаат за владејачката партија. Тоа го нема никаде не само во историјата на Македонија, туку никаде во Европа, можеби во Белорусија, но за такво нешто не сме слушнале. Се’ додека не се разоткријат виновниците се додека не се понесе одговорност ќе стои една голема дамка на претстојните парламентарни избори“, изјави Бранко Црвенковски.

Тој вели дека Груевски потпишува едно, а во практика прави друго. Обвини дека ја злоупотребува позицијата на власт,  врши притисок во вработените во администрацијата,  користи буџетските пари за свое промовирање.

„Во овие денови се случи и данок во крв со губење на животите на работници од проектот Скопје 2014, а тоа покажува дека безбедноста на работниците е на последно место. Се прави се’ само да му се овозможи на Груевски пред изборите да исече уште некоја лента и да закачи уште некоја панделка, а тоа со фер  и демократски избори нема никаква врска“ додаде Црвенковски.

И од Социјалдемократската унија велат дека граѓаните се сведоци на едно огромно лицемерие, особено од големите политички структури.

„Имавме едно флагрантно кршење на изборниот законик на правилата на фер и демократски избори. Ние како СДУ ќе се придржуваме кон одредени норми европски норми на однесување меѓутоа очигледно е дека нема да бидеме оптимисти дека тоа ќе биде остварено од другите политички субјекти“, изјави Лазар Еленовски.

„Се надевам дека ова потпишување нема да остане само на хартија. Сите досегашни индикации покажуваат дека се врши брутален притисок врз гласачите, дека се ставаат на списоци. И ние Демократската десница имаме такви списоци кои што се дадени на увид до ДИК. Очекуваме ДИК да се произнесе, бидејќи ова е најсериозен проблем, затоа што конкретни докази стојат на маса и истите се испратени до меѓународните институции“ изјави Филип Петровски од Демократска Десница.

„Овој кодекс претставува повеќе морален чин за нас како претседатели на партии, учесници во изборниот процес. Она што се случува на терен и она што се случува пред македонската јавност  е сосема друга слика“ рече Марјан Додовски од ВМРО- Народна партија.

Имер Селмани од Нова демократија изјави дека гарантира дека нивните активисти ќе направат се, изборите да бидат фер и демократски.

„Апелирам до сите граѓани масовни да излезат и да гласаат. Да не остават никаков простор, нивниот глас да се манипулира и се злоупотребува“ рече Имер Селмани од НД.

За Либерално-демократската партија оценува дека потпишувањето на Кодексот е тажен фактор за Македонија.

„Во Македонија и по 20 години независност ни се потребни странци за да ги седнат политичките лидери и да потпишат кодекс. Овој тажен фактор е непогрешлив индикатор дека за жал нашето општество стои во место, нивото на политичка култура и демократска зрелост е се уште ниско и, за жал, се’ уште ни се потребни тутори. Токму овој тажен факт треба да ги мотивира граѓаните и ова 20 годишно стоење во место на 5 јуни да го казнат и политичките партии ВМРО-ДПМНЕ и СДСМ коишто се најодговорни за ова стоење во место да бидат казнети на изборите“, рече Јован Манасиевски од ЛДП.

И Амди Бајрам од Сојузот на Ромите изрази надеж дека во Македонија ќе има коректни и фер избори.

„Знаете дека секогаш се случуваат проблеми кај Ромите.  Сите ромски политички партии сме во коалиција со ВМРО-ДПМНЕ, само една е отидена во коалиција со СДСМ. Мислам дека и тоа ќе биде средено“, рече Амди Бајрам.

„Либералната партија со задоволство го потпишува овој кодекс, како партија која никогаш не учествувале во притисоци и изборно насилство. Веруваме дека со нашата работа докажуваме дека во Македонија не само што мора, Македонија може и поинаку“, изјави Ивон Величковски од ЛП.

Од Националниот демократски институт, организација која ја спроведува кампањата  за донесување Кодексот, велат дека политичките партии по овој потпис треба да обезбедат фер и демократски избори.

„Во политиката треба да работиме со реалноста, но и со перцепциите. Има одредени перцепции дека овие избори нема да бидат фер и слободни. Но утринава се случи една реалност. Сите поканети политички лидери дојдоа и го дадоа својот потпис. Реалноста е позитивна. Сега политичките партии треба таа перцепција дека изборите нема да бидат фер и демократски да ја претворат во позитивна реалност односно да обезбедат изборите да бидат фер“ рече Крис Хеншоу од НДИ. Кампањата е финансирана од УСАИД.

Македонските граѓани на 5 јуни ќе гласаат на предвремените парламентарни избори./крај/фф