Од вечерва официјално започнува предизборната кампања за вторите по ред предвремени парламентарни избори што ќе се одржат на 5. jуни.

Од вечерва официјално започнува предизборната кампања за вторите по ред предвремени парламентарни избори што ќе се одржат на 5. jуни. Партиите и коалициите наредниве 20 дена ќе можат пред граѓаните да ги претстават своите програми и кандидати и да образложат пред граѓаните зошто ја бараат довербата од нив.ВМРО-ДПМНЕ првиот митинг традиционално ќе го одржи во Охрид, а СДСМ најавија протестен собир пред Владата. ДУИ изборниот карван ќе го почне од салата „Борис Трајковски“ во Скопје, а ДПА од Кондово. Кампањата ќе трае до 3. јуни на полноќ.  Завршните митинзи  СДСМ и ВМРО-ДПМНЕ ќе ги одржат во Скопје, а ДУИ во Тетово. Денот пред изборите односно 4.јуни е предизборен молк. Гласачките места треба да бидат отворени на 5. јуни во 7 часот, а затворени во 19 часот. На овие избори граѓаните ќе можат да изберат една од 18-те кандидатски листи.Изборите ќе бидат спроведени според пропорционалниот модел во шест изборни единици на територијата на земјава и три за македонските граѓани кои живеат надвор од држава. Минатата недела 30 политички партии потпишаа Кодекс на однесување за време на парламентарните избори со цел спроведување на фер и демократски избори.Изборите според она што досега е најавувано, треба да ги набљудуваат 332 претставници на Канцеларијата на ОБСЕ/ОДИХР и 3.500 на граѓанската асоцијација МОСТ. Одлуката за самораспуштање на последниот шести собраниски состав (кој, исто така, беше избран на предвремените избори пред три години), беше донесена  вечерта на 14 април со 79 гласови „за“, ниту еден против или воздржан. Освен владејачкото мнозинство, споменатата одлука ја поддржаа и дел од опозицијата – од ЛДП, ДПА и Нова демократија. СДСМ, НСДП, ЛП и Нова алтернатива (кои од 26 јануари го бојкотираат Собранието) не дојдоа ниту на последната собраниска седница. Собранискиот спикер Трајко Вељаноски ја потпиша наредниот ден на 15 април. Новиот парламент, кој треба да се конституира најдоцна до 25 јуни, првпат ќе има 123 пратеници – 120 и тројца од дијаспората, по еден од Европа, Америка и Австралија. Претседателот на државата во рок од десет дена од конституирањето на Собранието, треба да го довери мандатот за составување нова Влада на кандидат на партијата, односно партиите што имаат мнозинство во парламентот. Мандатарот најдоцна во рок од 20 дена треба на Собранието да му поднесе програма и да го предложи составот на новата влада. Ако се оди со крajните рокови пропишани во Уставот и во Изборниот законик, новиот владин кабинет треба да го добиеме на крајот на јули.Право на глас имаат околу 1,835 милиони граѓани на Република Македонија евидентирани во Единствениот избирачки список.Предвремените избори беа распишани на барање на опозицијата. По неколкуте неуспешни обиди на заедничка маса да се договорат лидерите на политичките партии, премиерот Никола Груевски донесе одлука тие да се одржат на 5 јуни. По воведувањето на политичкиот плурализам, во Република Македонија се одржани пет регуларни парламентарни избори и едни вонредни во 2008. Првите парламентарни избори се одржани кога земјата се уште беше во состав на СФР Југославија во 1990 година , а останатите по прогласувањето на независност во 1991 година. Првите предвремените парламентарни избори  се одржани на 1 јуни 2008 година, по изгласувањето и распуштањето на Собранието на 12 април 2008 година. Тоа беа први предвремени парламентарни избори од осамостојувањето на Република Македонија во 1991 година.На изборите победи коалицијата За подобра Македонија, предводена од ВМРО ДПМНЕ. Во Собранието влегоа 17 политички партии, од кои 10 со само еден пратеник.На 26 јули 2008 година е изгласана новата влада, составена од министри од ВМРО ДПМНЕ, од коалициските партнери во коалицијата За подобра Македонија и од ДУИ, како партија со најголема поддршка кај албанскиот електорат./крај/бд