Министерството за внатрешни работи утре ќе започне со дистрибуција на избирачките списоци и гласачките ливчиња од печатницата „Киро Дандаро“ во Битола до сите 84 Општински изборни комисии

„Министерството за внатрешни работи ќе ги преземе сите потребни мерки и активности согласно законските овластувања и надлежности за обезбедување на изборниот материјал, негово безбедно дистрибуирање и предавање на Општинските изборни комисии во рок од 72 часа пред денот определен за гласање, а потоа и негово предавање на избирачките одбори во рок од 24 часа пред денот на гласањето (2964 избирачки места). Доставувањето на изборниот материјал ќе се направи по претходна координација и доставено барање од Државната изборна комисија за обезбедување на доставувањето на изборниот материјал“ соопштуваат од МВР.За обезбедување на транспортот на изборниот материјал ќе се формираат полициски мото-патроли. Секој конвој ќе биде обезбеден со најмалку два автомобили, со полициски службеници од ЕБР и полициски советник од Секторот за полиција и криминалистички работи.Полициските советници пред пристигнувањето до ОИК ќе го известат командирот на надлежната полициска станица за отпочнувањето со физичкото обезбедување на објектот каде ќе биде сместен изборниот материјал.По доставата на изборниот материјал ќе се отпочне со физичко обезбедување на објектите каде ќе биде сместен гласачкиот материјал до завршувањето на гласањето, односно транспортот на гласачкиот материјал до ДИК.„МВР преку планирани мерки и активности во изборниот период ќе овозможи непречена работа на надлежните органи за спроведување на парламентарните избори 2011 година, како и обезбедување на целокупниот избирачки и гласачки материјал и објектите каде ќе биде сместен“ велат од МВР.Министерството денеска завршува со дистрибуција на кутии, паравани до ОИК.