Одбраната од случајот „Пајажина“ на денешното продолжение на судењето приговараше на записникот од минатата седница добиен по електронски пат, кој наместо на 7 страници беше на 17.

Одбраната од случајот „Пајажина“ на денешното продолжение на судењето приговараше на записникот од минатата седница добиен по електронски пат, кој наместо на 7 страници беше на 17.

Во записникот од 14 јуни се наведува дека главниот претрес е започнат, дека обвинителката Гордана Гешковска го прочитала обвинението, сите обвинети дале свој исказ и оти остануваат на она што го кажале пред Истражниот судија.

Кај адвокатите дошла дактилографката, која го правела записникот и кажала дека секогаш записниците ги составувала пред време.

Според судскиот совет вака составениот записник од страна на дактилографката е само техничка грешка.

Првообвинетиот Велија Рамковски смета дека ваквиот чин е политички монтиран процес.

„Ова не е техничка грешка и не верувам дека дактилографката е до толку трудољубива. Мене ова ме упатува на тоа дека е политички монтиран процес, наместен и режиран пред време. Можеби некаде постои и готова пресуда“, рече Рамковски.

Адвокатот Мирослав Вујиќ исто така побара и невропсихијатриско вештачење на писмениот налог од психијатриска ординација од Скопје, во кој стои дека Ѓултен Џемаили може да го следи текот на главниот претрес.

Вуиќ смета дека е потребно вештачење затоа што ординацијата по новиот закон за добивање лиценца нема добиено лиценца за вешто лице.

На денешното рочиште беше предвидено да биде прочитан обвинителниот акт, како и првообвинетиот Рамковски да даде исказ пред судот. Процесот беше одложен на 14-ти јуни, откако една од обвинетите не беше во здравствена состојба да продолжи со следење на главниот претрес.

Судскиот совет го прифати предлогот на адвокатите да се изврши медицински преглед во стручна установа на обвинетата Ѓултен Џемаили, по што лекарите треба да се произнесат дали Џемаили е способна да го следи судењето.

На синот на Велија, Хеди Рамковски ќе му се суди во отсуство.

Во обвинителниот акт образложен на 79 страници, Велија Рамковски и останатите 22 обвинети се товарат за злосторничко здружување, даночно затајување, перење пари и други приноси од казниво дело, злоупотреба на службената положба и овластување и оштетување или повластување доверители, а тројца од групата  обвинети за спречување на докажување./крај/бд