Отпуштените новинарки на Утрински весник тврдат дека добиле отказ бидејќи учествувале во спонтаниот прекин на работа кој се случи во петокот, кога вработените на Утрински ја стопираа работата

Отпуштените новинарки на Утрински весник тврдат дека добиле отказ бидејќи учествувале во спонтаниот прекин на работа кој се случи во петокот, кога вработените на Утрински ја стопираа работата поради најавите на компанијата која ги издава дека од Утрински ќе се отпуштаат десет новинари.

„Ние сме посочени како поттикнувачи и организатори на протестот зад кој застана мнозинството од вработените, посочени бевме дека не ги извршуваме работните обврски. Меѓутоа, тоа не е точно, јас наредниот ден дојдов на работа и направив две страници од весникот и цела недела пишувам и текстови и коментари и денеска има мој текст во весникот. Во Утрински весник сум 12 години од неговото основање, а денеска ми беше усно кажано дека имам забрана за влегување во редакцијата за да си ги соберам личните работи. Мислам дека со отказите сакаат да испратат порака до колегите кои не се отпуштени од работа да бидат тивки и да ја слушаат главната уредничка и да го згаснат весникот тивко“ изјави новинарката Оливера Војновска, на која заедно со нејзината колешка Билјана Јовановска им беа врачени откази.

„Денеска добивме отказ затоа што  го искористивме нашето демократско право да учествуваме во спонтаниот прекин на работа што се случи во петокот. Добивме образложение за отказ без да бидеме сослушани. Образложението е темелено буквално на лагите на главниот уредник. Како да сме припадници на Ал Каеда, во нашата матична редакција ни забрануваат да влеземе. Уредничката ни најавуваше дека ќе добиеме суспензија, па отказ, а меѓудругото ни беше кажано дека сме учествувале и на некоја непријателска телевизија, јасно е на која мислат. Протестот кој се случи во петокот беше поддржан од мнозинството, од 47 вработени само четворица не се сложуваа“ рече Јовановска.

Главниот и одговорен уредник на Утрински весник, Соња Крамарска за Макфакс изјави дека за неа како уредник секогаш е штета кога работи со помал број новинари.

„Јас не сум работодавач;, не отпуштам и не примам новинари. Тоа е одлука на компанијата која ги издава весниците“ вели Крамарска.

Но на прашањето дали имаат поврзаност овие откази со минатонеделниот штрајк, Крамарска вели дека минатата недела нелегално била прекината работата.

„Имаше повици да не излезе весникот. Се случи инцидент“ вели Крамарска. После овој настан, компанијата решила да преземе мерки во врска со овој, според Крамарска, нелегален прекин на работа.

По најавите дека дневните весници „Шпиц“, „Време“, „**** е Ре“ утре ќе излезат за последен пат и отказите што ги добија две новинарки на Утрински весник со реакција излезе и Самостојниот синдикат на новинарите на Македонија.

„Денеска сме сведоци на страшна порака што ја доби медиумската заедница, дека сме немоќни и жртви на големите игри што се водат преку наш грб. Секоја обид да се побуниме и да проговориме јавно за тоа кои се нашите проблеми, експресно се соочуваме, како што е случајот со колешките од Утрински весник, со откази со,  забрани за влез во редакцијата како последица на протестот од минатиот петок“, рече Тамара Чаусидис, претседател на медиумскиот синдикат.

Синдикатот најави и дека ќе ги искористат сите правни средства со кои располагаат и во случајот со весниците кои нема веќе да излегуваат.

„Ние ќе ги искористиме сите правни средства што ги располагаме како Синдикат но, нема да останеме само на тоа. Време е да покажеме солидарност и веднаш ќе се консултираме со нашите синдикални претставништва и нашите членови кои за ова гледаат  потреба да се обединиме и да се солидализираме“ рече Чаусидис

Претседателот на Здружението на новинари, Насер Селмани  најави дека ЗНМ ќе се приклучи кон чекорите на синдикатот, бидејќи новинарската фела не смее да дозволи ова и понатаму да се случува.

Синдикатот за во недела најави прес-конференција на која подетално ќе се соопштат информации за медиумските случувања и за преземање на следните чекори./крај/фф