Собранието на Република Македонија денеска ја изгласа предлог одлуката, законодавниот дом да има тројца потпретседатели, како што тоа беше и досега.

Собранието на Република Македонија денеска ја изгласа предлог одлуката, законодавниот дом да има тројца потпретседатели, како што тоа беше и досега. Еден потпретседател од ВМРО-ДПМНЕ еден од ДУИ и еден од СДСМ. Во наредните денови треба да бидат познати имињата на потпретседателите, а според партиски извори, тоа најверојатно ќе бидат Светлана Јакимовска од ВМРО-ДПМНЕ, Јани Макрадули од СДСМ и од ДУИ Хајрула Мисини од ДУИ. Собранието денеска донесе одлука за формирање на Собраниски комисии, како и основање на делегации и пратенички групи и други облици на меѓународна соработка. Исто така пратениците ја изгласаа и изменување на одлуката за основање на национален совет, која предвидува членовите на ова тело да имаат и заменици, бидејќи како што се наведува во образложението на истата, поради континуитетот во остварувањето на своите надлежности, а со цел надминување на одделни појави кои во досегашното работење на советот се случуваа треба да се назначат и девет заменици членови. Според најавите утре треба да биде закажана седницата на Комисијата за избори и именувања, на која треба да биде утврден персоналниот состав на телата и делегациите за кои денеска Собранието донесе одлука дека треба да се формираат.

На седницата ќе бидат разгледани и доставените барања за остварување на плата по престанок на функцијата пратеник односно апанажа.   Пред гласањето за одлуките претседателот на Собранието, Трајко Вељаноски ги констатираше оставките на пратениците Никола Груевски и Горан Трајковски. Опозицијата реагираше на ова тврдејќи дека е направено кршење на Уставот. Повикувајќи се на членот 52 од Уставот на Република Македонија, пратеникот Игор Ивановски од СДСМ, рече дека пратеникот што поднесува оставка мора лично да ја поднесе оставката и да ја образложи на седница на Собранието, а Груевски и Трајковски не биле присутни на денешната седница.„Недозволиво е да го кршите Уставот и законите, ова е брутално, бараме да го почитувате Уставот. Вие денеска одземате мандат на пратеници кои не се тука“, рече Ивановски. Вељаноски на тоа одговори дека тој само ја констатирал оставката и дека тоа е пракса на Собранието и посочи дека се констатира без претрес и без расправа. крај/бд