Министерството за правда да пристапи кон измени на Законот за бесплатна правна помош, со цел негова посеопфатна примена, бараат од Фондацијата Отворено општество – Македонија и Македонското здружение на млади правници

Според овие две организации, граѓаните не се доволно информирани за законот, постојат престроги услови за регистрација на здруженија за давање на правна помош, но и дека  областите на кој се однесува се ограничени. Дополнително, од ФООМ и МЗМП сметаат дека корисници на бесплатна правна помош може да бидат лица кои живеат во голема беда, но не и сиромашни граѓани кои имаат минимални примања и некаков имот. Се забележува и на отсуство на посебен орган што би одлучувал по барањата за бесплатна правна помош, но и на непостоење на хармонизиран меѓу институционален систем за обезбедување на докази. „Секако ќе се обратиме до сите. Прво ќе почнеме од оние што го предлагаат, а тоа е Министерството за правда. Доколку не наидеме на слух кај дека е неопходно да се измени, а треба да бидат свесни дека располагаат со мал буџет и има мал број барања, тогаш ќе се обратиме до сите пратеници и заинтересирани за да промениме овој закон и да биде вистински закон за бесплатна правна помош за сите баратели. Да немаме случаи на исклучени категории на лица, чија што издршка е доведена во прашање, а од друга страна, затоа што не се корисници на социјална помош и слични барања од законот да не го користат ова право“, вели Данче Даниловска од ФООМ.„Ние продолживме со анализата на примената на законот со цел да добиеме што пообјективни, поисцрпни информации од примената на законот, со цел да ги констатираме и нотираме можните точки каде што би настанале проблеми околу имплементација на законот и за на крај да можеме да понудиме едни квалитетни амандмани. Така што продолжуваме со анализата до крајот на оваа година“, рече Гоце Коцевски од МЗМП.Извештајот се издава по повод една година од примената на овој закон.